අද (03) දින තොරතුරු තාක්ෂණ නියෝජිත ආයතනයේ දී පැවැති විශේෂ මාධ්‍ය සාකච්ඡාවකදී, 2025 සංඛ්‍යාත වෙන්දේසිය සඳහා අවශ්‍ය 5G අවසාන පැවරීම පිළිබඳ නිවේදනය (Notice of Assignment – NoA) ප්‍රකාශයට පත් කරන ලදී.

මෙම අවස්ථාවට ඩිජිටල් ආර්ථික නියෝජ්‍ය අමාත්‍ය එරංග වීරරතන, ඩිජිටල් ආර්ථික අමාත්‍යංශයේ වැඩබලන ලේකම්, විදුලි සංදේශ නියාමන කොමිසන් සභාවේ සභාපති වරුන ධනපාල, විදුලි සංදේශ නියාමන කොමිෂන් සභාවේ අධ්‍යක්ෂ ජනරාල් බන්දුල හේරත්, 5G වෙන්දේසි කමිටුවේ සභාපති, මුදල් අමාත්‍යංශයේ අධ්‍යක්ෂක ජෙනරාල්, ආචාර්ය සුලක්ෂණ ජයවර්ධන, විදුලි සංදේශ නියාමන කොමිෂන් සභාවේ අධ්‍යක්ෂ ශාන්ත ගුණානන්දන යන මහත්වරුන් සහභාගී වූහ.

මෙහිදී අදහස් දක්වමින් ඩිජිටල් ආර්ථික නියෝජ්‍ය අමාත්‍යවරයා පෙන්වා දුන්නේ අවසාන පැවරීමේ මඟින් නව පරම්පරාවේ දුරකථන හා තොරතුරු සන්නිවේදන සේවාවන් පුළුල් කිරීමට බලවත් පදනමක් සලසනු ඇති බවයි. විශේෂයෙන්ම 5G තාක්ෂණය, ශ්‍රී ලංකාවේ ආර්ථිකය, නවෝත්පාදනය සහ කර්මාන්තශීලී වර්ධනය සඳහා ප්‍රධාන මෙය මංපෙතක් බවද ඔහු පෙන්වා දුන්නේය.

එසේම වේගවත් අන්තර්ජාල පහසුකම්, අඩු ප්‍රමාද සහගත සන්නිවේදන සේවාවන් සහ නව තාක්ෂණික යටිතල පහසුකම් හරහා, වෛද්‍ය, අධ්‍යාපන, කෘෂිකර්මාන්ත හා ඇඟලුම් වැනි ප්‍රධාන කර්මාන්තයන්ට නව ජීවනයක් ලබා දිය හැකි බවත්, උදාහරණ ලෙස, කෘෂිකර්මාන්තය තුළ ස්මාර්ට් සංවේදක භාවිතයෙන් අස්වැන්න වැඩි කරගැනීම සහ සම්පත් නාස්ති අඩු කිරීම, ඇඟලුම් කර්මාන්තයේ ස්වයංක්‍රීය පද්ධති හරහා ගුණාත්මකභාවය සහ නිෂ්පාදන ධාරිතාව වැඩි කිරීමට උපයෝගී කරගත හැකි බවත් ඔහු ප්‍රකාශ කළේය.

මින් අනතුරුව අදහස් දැක්වූ විදුලි සංදේශ නියාමන කොමිෂන් සභාවේ අධ්‍යක්ෂ ජෙනරාල් බන්දුල හේරත් මහතා පෙන්වා දුන්නේ 2017 වසරේ සිට මේ දක්වාම 5G සේවාව ලබා දීමට උත්සාහයන් ගත්තද එය මේ දක්වාම ක්‍රියාත්මක නොවුණ බවයි, ඒ අනුව 2017 සිට 2020 දක්වා කාලය තුළ තාක්ෂණික සහ අනෙකුත් කරුණු සම්බන්ධයෙන් විදුලි සංදේශ කොමිෂන් සභාව මඟින් නියාමනයක් සිදු කළ අතර 2020-2022 වසරවලදී ලෝක බැංකුවේ තාක්ෂණික කමුටුව සහ ජාත්‍යන්තර විදුලි සංදේශන සංගමය, ජංගම දුරකතන සඳහා ගෝලීය සංගමය සමඟින් සිදුකළ තාක්ෂණික සාක්ච්ඡාවලින් අනතුරුව වඩාත් හොඳ සංඛ්‍යාත පරාසය සම්බන්ධයෙන් තීරණයකට පැමිණි බවයි.

කෙසේ නමුත් දීර්ඝ ක්‍රියාවලියකින් පසුව වෙන්දේසියේ අවසාන පැවරුම් නිවේදනය සිදු වන්නේ 2025 වසරේ දී බවත් එය සියලු අනුමැතීන් සඳහා යොමු කර අනුමැතීන් ලබාගැනීමෙන් අනතුරුව බවත් එතුමා මෙහිදී අවධාරණය කළේය. නිවේදනයෙන් මාස 2කකට ආසන්න කාලයක් තුළ වෙන්දේසි ක්‍රමවේදය නිම කිරීමට බලාපොරොත්තු වන අතර එම ක්‍රියාවලියෙන් පසුව ජනතාව සඳහා විදුලි සංදේශ සේවාව අත්විඳීමේ හැකියාව හිමිවන බවත් ඔහු තව දුරටත් පෙන්වා දුන්නේය.

5G Auction කමිටු සභාපති, මුදල් අමාත්‍යංශයේ අධ්‍යක්ෂක ජෙනරාල්, ආචාර්ය සුලක්ෂණ ජයවර්ධන මහතා විසින් විකිණුම් ක්‍රියාවලිය පිළිබඳ සවිස්තරාත්මක ඉදිරිපත් කිරීමක් සිදු කල අතර මේ සඳහා දින 40 ක කාලයක් ලබා දෙන බවත් ඊට අදාළ සියලු තොරතුරු, ශ්‍රී ලංකා විදුලි සංදේශ නියාමන කොමිෂන් සභාවේ වෙබ් අඩවියෙහි උඩුගත කර තිබෙන බවත් නිවේදනය කළ අතර, අදාල ක්‍රියාවලියා ඉහළ විනිවිද භාවයකින් යුතුව පවත්වාගෙන යාම සිදු කෙරෙන බවත් දන්වා සිටියේය.

මෙහිදී අදහස් දක්වමින් විදුලි සංදේශ නියාමන කොමිෂන් සභාවේ අධ්‍යක්ෂ ශාන්ත ගුණානන්දන මහතා ප්‍රකාශ කළේ, 5G තාක්ෂණය ශ්‍රී ලංකාවේ ජන ජීවිතයට විශාල පරිවර්තනයක් ළඟාකරනු ඇති බවයි. එහිදී ඔහු පැහැදිළි කළේ ගම්මාන සහ නගර අතර තාක්ෂණික පරතරය අවම කරමින්, සියලු දරුවන්ට සහ පවුල් වලට ගුණාත්මක අධ්‍යාපනික හා ආර්ථික අවස්ථා ලබා දීමටත්, COVID-19 වසංගතයේදී අත්වින්දාක් මෙන් අන්තර්ජාලය ජීවිතයේ අත්‍යවශ්‍ය මූලික පහසුකමක් බව තහවුරු කිරීමටත් මෙම තාක්ෂණය දායක වනු ඇති බවයි.

අවසාන වශයෙන් ඔහු සඳහන් කලේ විදුලි සංදේශ නියාමන කොමිෂන් සභාව සහ 5G වෙන්දේසි කමිටුව හා එක්ව නීතිගත හා තාක්ෂණික සම්මත යටතේ මෙය ක්‍රියාත්මක කර ඇති බවයි. 2025 සංඛ්‍යාත වෙන්දේසිය ශ්‍රී ලංකාවට නව තාක්ෂණික මංපෙතක් විවෘත කරමින්, ආර්ථිකය සහ ජන ජීවිතය උච්චතම මට්ටමට ගෙන යාමට ප්‍රබල දායකත්වයක් ලබා දෙනු ඇති බව තමන් විශ්වාස කරන බවත් හෙතෙම පැවසීය.

මේ සම්බන්ධයෙන් වැඩිදුර තොරතුරු සඳහා විදුලි සංදේශ නියාමන කොමිෂන් සභාවේ වෙබ් අඩවිය වෙත පිවිසෙන්න: https://www.trc.gov.lk/index_s.php