නාමලී ඒ. සිල්වා මහත්මිය ප්‍රධාන ව්‍යාපාර නිලධාරිනිය ලෙසත්, ශංකර් ධර්මරත්න මහතා ප්‍රධාන ඩිජිටල් නිලධාරී ලෙසත් පත් කෙරේ.

මෙරට රක්ෂණ ක්ෂේත්‍රයේ පුරෝගාමියෙකු මෙන්ම JXG (ජනශක්ති සමූහ ව්‍යාපාරය) හි අනුබද්ධ සමාගමක් වන Janashakthi Life විසින් පසුගියදා සිය විධායක කණ්ඩායම සඳහා නව පත්වීම් දෙකක් සිදුකරන ලදි. ඒ අනුව නාමලී ඒ. සිල්වා මහත්මිය ප්‍රධාන ව්‍යාපාර නිලධාරිනිය ලෙසත්, ශංකර් ධර්මරත්න මහතා ප්‍රධාන ඩිජිටල් නිලධාරී ලෙසත් පත් කර තිබේ.

මෙය Janashakthi Life සමාගම විසින් සිය ව්‍යාපාර කටයුතුවල වර්ධනය වේගවත් කිරීම, වෙළඳපොළ ආවරණය පුළුල් කිරීම සහ සමාගමේ සියලු අංශ ඩිජිටල්කරණය කිරීම සඳහා ගනු ලබන උත්සාහයේ වැදගත් සන්ධිස්ථානයක් ලෙස හැඳින්විය හැක.

නාමලී ඒ. සිල්වා මහත්මිය බැංකු, මූල්‍ය සහ රක්ෂණ යන ක්ෂේත්‍ර තුළ වසර 36 කට වැඩි පළපුරුද්දක් ඇති දක්ෂ අලෙවිකරණ සහ ව්‍යාපාර වෘත්තීයවේදිනියකි. ඇය කොමර්ෂල් බැංකුව, Nationwide Building Society (එක්සත් රාජධානිය), Lloyds Bank (එක්සත් රාජධානිය), සෙලාන් බැංකුව, මහජන බැංකුව සහ ශ්‍රී ලංකා ඉන්ෂුවරන්ස් සමාගම ඇතුළු ප්‍රමුඛ පෙළේ ආයතන රැසක ජ්‍යෙෂ්ඨ නායකත්ව තනතුරු දරා ඇති අතර, Janashakthi Life සමඟ එක්වීමට පෙර ඇය ශ්‍රී ලංකා ඉන්ෂුවරන්ස් සමාගමේ ප්‍රධාන ව්‍යාපාර නිලධාරිනිය ලෙස සේවය කළාය. ක්ෂේත්‍ර රැසක් සම්බන්ධයෙන් ඇය සතු විශේෂඥ දැනුම සහ ක්‍රමෝපායික අවබෝධය Janashakthi Life සමාගමේ ඉදිරි ගමනට බෙහෙවින් වැදගත් වනු ඇත.

ශංකර් ධර්මරත්න මහතා බැංකු, දුරකථන සන්නිවේදන සහ තාක්‍ෂණ යන ක්ෂේත්‍රවල වසර 25කට වැඩි සේවා කාලයක් සම්පූර්ණ කර තිබේ. ඔහු Dialog Axiata PLC, Royal Vision Singapore (පුද්ගලික) සමාගම සහ හැටන් නැෂනල් බැංකුව යන ආයතනවල ප්‍රධාන තනතුරු දරා ඇති අතර, මෙම තනතුරට පත්වීමට පෙර ඔහු හැටන් නැෂනල් බැංකුවේ ඩිජිටල් සේවා ප්‍රධානී ලෙස කටයුතු කළේය. එමෙන්ම ඔහු ජාතික ගෙවීම් කවුන්සිලය සහ ශ්‍රී ලංකා මහ බැංකුවේ ඩිජිටල් මාර්ගෝපදේශ කමිටුව සමඟ එක්ව කටයුතු කරමින් ජාතික මට්ටමේ ඩිජිටල් වැඩසටහන් සඳහා ද දායක වී ඇත. ඒ මහතා සතු විශේෂඥ දැනුම හා පළපුරුද්ද, Janashakthi Life සමාගමේ ඩිජිටල් ක්‍රමෝපාය සාර්ථක ලෙස ක්‍රියාවට නංවමින් පාරිභෝගික අත්දැකීම් වැඩිදියුණු කිරීම සහ නවෝත්පාදනයන් හඳුන්වා දීම සඳහා මහෝපකාරී වනු නිසැකය.

“නාමලී ඒ. සිල්වා මහත්මිය සහ ශංකර් ධර්මරත්න මහතා අපගේ නායකත්ව කණ්ඩායමට සාදරයෙන් පිළිගන්නවා. අපගේ ක්‍රමෝපායික ඉලක්ක ළඟා කරගනිමින් ගනුදෙනුකරුවන්ට විශිෂ්ටතම සේවාවක් ලබාදීමේ උත්සාහය තුළ ඔවුන් සතු පළපුරුද්ද සහ නායකත්ව කුසලතා අපට බෙහෙවින් වැදගත් වේවි.” ජනශක්ති ලයිෆ් සමාගමේ අධ්‍යක්ෂ/ප්‍රධාන විධායක නිලධාරී රවී ලියනගේ මහතා පැවසීය.

මෙබඳු ක්‍රමෝපායික පත්කිරීම් ඔස්සේ, මෙරට රක්ෂණ ක්ෂේත්‍රයේ වෙනස්කම්වලට සාර්ථක ලෙස මුහුණ දෙමින් සමාගම දියුණුව කරා මෙහෙයවීමේ හැකියාව ඇති ශක්තිමත් සහ ඉදිරිගාමී දැක්මක් සහිත නායකත්ව කණ්ඩායමක් නිර්මාණය කිරීම සඳහා Janashakthi Life කැප වී සිටී.

ඡායාරූප:

1. Janashakthi Life ප්‍රධාන ව්‍යාපාර නිලධාරිනී නාමලී ඒ සිල්වා මිය
2. Janashakthi Life සමාගමේ ප්‍රධාන ඩිජිටල් නිලධාරී ශංකර් ධර්මරත්න මහතා