ඉන්දියාවේ ප්‍රමුඛ අඩු වියදම් ගුවන් සේවයක් වන ඉන්ඩිගෝ (IndiGo) ගුවන් සේවය, ඔක්තෝබර් 01 වැනිදා සිට ඉන්දියාවේ ප්‍රධාන නගර කිහිපයක් සහ ශ්‍රී ලංකාව අතර දෛනික ගුවන් ගමන් සේවා නිල වශයෙන් යළි ආරම්භ කර තිබේ. එමඟින් අසල්වැසි රටවල් දෙක අතර දේශසීමා හරහා ගුවන් සම්බන්ධතාව සහ සංචාරක ඉල්ලුම වර්ධනය කිරීම සඳහා වැදගත් පියවරක් සනිටුහන් කරයි.

විවේක සංචාර සහ ව්‍යාපාරික කටයුතු සඳහා ගමන් කරන මගීන්ට පහසු සෘජු ගුවන් සම්බන්ධතාවක් ලබාදෙමින්, උපායමාර්ගික වශයෙන් වැදගත් ගුවන් ගමන් මාර්ග තුනක් ඔස්සේ සේවා යළි ස්ථාපිත කිරීමට ඉන්ඩිගෝ ගුවන් සේවය කටයුතු කර ඇත.

ඒ අනුව, නවදිල්ලිය – කොළඹ සහ බැංගලෝර් – කොළඹ අතර දෛනික ගුවන් ගමන් යළි ආරම්භ වන අතර, ඉන්දියාවෙන් ශ්‍රී ලංකාව වෙත පැමිණෙන සංචාරකයන් මෙන්ම ව්‍යාපාරික හා රාජ්‍යතාන්ත්‍රික කටයුතු සඳහා ගමන් කරන මගීන්ගේ ඉහළ ඉල්ලුම සපුරාලීමට මෙම සේවාවන් මඟින් හැකියාව ලැබේ.

2026 ඔක්තොම්බර් 01 (ඊයේ) දින ඉන්දියාවේ ට්‍රිචි ගුවන්තොටුපළේ සිට යාපනයේ ජාත්‍යන්තර ගුවන්තොටුපළ (JIA) දක්වා ගුවන් ගමන් මාස 3කට පසු නැවත ආරම්භ විය.

මෙම ගුවන් සේවාව සතියේ අඟහරුවාදා, බ්‍රහස්පතින්දා, සෙනසුරාදා දිනවල සතියට දින 3ක් බැගින් ක්‍රියාත්මක වීමට නියමිතය. එම දින තුන තුළ පස්වරු 1.05ට ඉන්දියාවේ ට්‍රිචි ගුවන්තොටුපළින් පිටත්වන ගුවන්යානය පස්වරු 1.50ට යාපනය ගුවන්තොටුපළට ළඟා වේ. එම ගුවන්යානය නැවත පස්වරු 2.30ට ඉන්දියාවේ ට්‍රිචි ගුවන්තොටුපළ බලා පිටත් වේ. මාස 3කට පසු ඊයේ ආරම්භ වූ ගුවන් ගමනට යාම් ඊම් සඳහා ගුවන් මඟීන් 88 දෙනෙකු ගුවන් ගමන් පහසුකම් ලබා ගත්හ. මෙම ගුවන් සේවාව නැවත ක්‍රියාත්මක වීම මඟින්, උතුරේ ජනතාවට ඔවුන්ගේ ඉන්දියාව බලා යන ගමන් වලදී සිය ගමනාන්තයට ඉතා කෙටි කාලයකින් ගමන් කිරීමට හැකි වීම ගැන සිය ප්‍රසාදය පල කළහ.

මෙම සෘජු කලාපීය ගුවන් මාර්ගය මඟින් තමිල්නාඩුව සහ ශ්‍රී ලංකාවේ උතුරු පළාත අතර පවතින දිගුකාලීන සංස්කෘතික, වෙළෙඳ සහ පවුල් සබඳතා තවදුරටත් ශක්තිමත් කිරීමට දායක වනු ඇත. ට්‍රිචි – යාපනය සෘජු ගුවන් සේවාව මඟින් කලාපීය මගීන්ට වඩාත් පහසු සහ කාර්යක්ෂම ගමන් පහසුකම් සැලසෙයි.

මෙම ගුවන් සම්බන්ධතා යළි ශක්තිමත් කිරීම දෙරට අතර සංචාරක, වෙළෙඳ, ආර්ථික සහ සමාජීය සබඳතා තවදුරටත් වර්ධනය කිරීමටද වැදගත් දායකත්වයක් සපයනු ඇත.