2016 ජූනි මාසයේ දී ජාත්‍යන්තර මූල්‍ය අරමුදලේ විස්තීරණ ණය පහසුකමෙහි පළමු වාරිකව ලෙස එක්සත් ජනපද ඩොලර් මිලියන 168 ක් ලැබීමත් සමගම මූල්‍ය ගිණුම ශක්තිමත් විය. මෙය ජාත්‍යන්තර මූල්‍ය අරමුදලේ විස්තීරණ ණය පහසුකම යටතේ ලද පළමු ණය වාරිකය වේ.

ජූනි මාසය තුළ දී ඒකාබද්ධ ණය වශයෙන් ලබාගත් එක්සත් ජනපද ඩොලර් මිලියන 300 මගින් ද මූල්‍ය ගිණුම ශක්තිමත් විය. ඒ අනුව 2016 වසරේ පළමු මාස හය තුළ දී රජය වෙත වූ මුළු විදේශීය ණය 2015 වසරේ පළමු මාස හය තුළ දී වූ එක්සත් ජනපද ඩොලර් මිලියන 147.2 ක ශුද්ධ ලැබීමට සාපේක්ෂව එක්සත් ජනපද ඩොලර් මිලියන 353.9 ක ශුද්ධ ලැබීමක් විය.

2016 ජූනි මාසයේ දී වූ එක්සත් ජනපද ඩොලර් මිලියන 71.1 ක ශුද්ධ ලැබීමත් සමඟ රාජ්‍ය සුරැකුම්පත්වල වූ විදේශීය ආයෝජන ද නැවත ඉහළ ගියේය. වසරේ පළමු කාර්තුවේ දී ශුද්ධ ගෙවීමක් වාර්තා කළ රාජ්‍ය සුරැකුම්පත්වල වූ විදේශීය ආයෝජන දෙවන කාර්තුවේ දී ක්‍රමයෙන් වර්ධනය විය. 2016 වසරේ පළමු භාගයේ දී රාජ්‍ය සුරැකුම්පත් හි විදේශීය ආයෝජන එක්සත් ජනපද ඩොලර් මිලියන 371.8 ක සමුච්ඡිත ශුද්ධ ගෙවීමක් විය.

තවද 2016 වසරේ පළමු භාගයේ දී කොළඹ කොටස් වෙළෙඳපොළෙහි විදේශීය ආයෝජන එක්සත් ජනපද ඩොලර් මිලියන 40.9 ක ශුද්ධ ගෙවීමක් වාර්තා කළ අතර, එය ද්විතීයික වෙළෙඳපොළෙ වෙතින් වූ එක්සත් ජනපද ඩොලර් මිලියන 42.2 ක ශුද්ධ ගෙවීමකින් සහ ප්‍රාථමික වෙළෙඳපොළ වෙත වූ එක්සත් ජනපද ඩොලර් මිලියන 1.3 ක ලැබීමකින් සමන්විත විය.

ශ්‍රී ලංකා මහ බැංකුවේ ආර්ථික පර්යේෂණ දෙපාර්තමේන්තුව සිනි් 2016 ජූනි මාසයේ දී විදේශීය අංශයේ ක්‍රියාකාරිත්වය සම්බන්ධයෙන් නිකුත් කරන ලද වාර්තාවක මේ බව සඳහන් වේ.