Mahindra Ideal Finance Limited (MIFL), 2026 මාර්තු 31 වන දිනෙන් අවසන් වූ මූල්‍ය වසර සඳහා සිය ඉතිහාසයේ සාර්ථකම හා ඉහළම මූල්‍ය ප්‍රතිඵල වාර්තා කිරීමට සමත්ව ඇත. එහිදී සමාගමේ ලාභදායිත්වය, ණය ලබා දීමේ ප්‍රමාණය සහ මෙහෙයුම් කාර්යක්ෂමතාව යන අංශවල කැපී පෙනෙන වර්ධනයක් සනිටුහන් කිරීමට සමාගම සමත්ව තිබේ.

අදාල කාල පරිච්ඡේදයේදී MIFL රු. මිලියන 818 ක බදු පෙර ලාභයක් වාර්තා කර ඇති අතර, එය පසුගිය වසරට සාපේක්ෂව 193%ක කැපී පෙනෙන වර්ධනයකි. මේ අතර සමාගමේ බදු පසු ලාභය පසුගිය වසරට සාපේක්ෂව 228% කින් රු. මිලියන 478ක් දක්වා වර්ධනය වී ඇත. 2025-26 මූල්‍ය වර්ෂය තුළ සමාගම ලබාදුන් සමස්ත ණය ප්‍රමාණය රු. බිලියන 57.6ක් දක්වා වර්ධනය වී ඇති අතර, එය පසුගිය වසරට සාපේක්ෂව 98%ක කැපී පෙනෙන ඉහළ යාමකි. MIFL සතු විවිධ මූල්‍ය සේවා යටතේ ණය පහසුකම් ලබාදීම අඛණ්ඩව පුළුල් කිරීම මෙම වර්ධනයට ප්‍රධාන වශයෙන් හේතු විය.

2025-26 මූල්‍ය වර්ෂයේ මූල්‍ය ප්‍රතිඵල පිළිබඳව අදහස් දක්වමින් Mahindra Ideal Finance හි කළමනාකාර අධ්‍යක්ෂ සහ ප්‍රධාන විධායක නිලධාරී මුෆාඩල් චූනියා මහතා පැවසුවේ “පසුගිය වසරේදී මෙරට ආර්ථික තත්ත්වයන් යහපත් වීමත්, වාහන ලීසිං ක්ෂේත්‍රයේ ඇති වූ පිබිදීමත් හේතුවෙන් අපගේ මූල්‍ය පහසුකම් සඳහා ඉහළ ඉල්ලුමක් නිර්මාණය වුණා. ඒ සමඟම, ණයවල ගුණාත්මකභාවය ඉහළ මට්ටමක පවත්වා ගැනීමට, පිරිවැය කළමනාකරණය සහ පාරිභෝගික සබඳතා ශක්තිමත් කිරීමට අප විශේෂ අවධානයක් යොමු කළ අතර අපගේ ණය ලබා දීම් මෙන්ම ලාභදායිත්වය ඉහළ යාමට මෙය සෘජුවම බලපානු ලැබුවා. සමාගම තවදුරටත් ව්‍යාප්ත වන අතරේදී අපගේ ප්‍රමුඛතාවය වන්නේ මෙම සාර්ථකත්වය ඉදිරියටත් පවත්වා ගනිමින් පාරිභෝගිකයින්ට විශ්වාසනීය සහ පහසු මූල්‍ය විසඳුම් ලබා දීමයි.” යනුවෙනි.

මෙම වසර තුළ සමාගමේ මෙහෙයුම් කාර්යක්ෂමතාව කැපී පෙනෙන වර්ධනයක් පෙන්නුම් කළේය- ආදායමට සාපේක්ෂ පිරිවැය අනුපාතය (cost-to-income)  68.9% සිට 50.5% දක්වා සැලකිය යුතු ලෙස අඩු වී ඇති අතර මෙහෙයුම් පිරිවැය අනුපාතය (Opex ratio) ද 8.0% සිට 5.6% දක්වා පහළ ගොස් ඇත. සමාගමේ ලාභදායිත්වයද තවදුරටත් ශක්තිමත් වී ඇති අතර, පසුගිය වසරේ 1.88% හා සැසඳීමේදී වත්කම් මත ප්‍රතිලාභ අනුපාතය (ROA) 3.40% ක් සහ කොටස් හිමිකම් මත ප්‍රතිලාභ අනුපාතය (ROE) පසුගිය වසරේ 4.85% හා සැසඳීමේදී 14.40% ක් ලෙස වාර්තා වී ඇත. මෙමගින් සමාගමේ ඉපැයීම්වල ගුණාත්මකභාවය සහ ප්‍රාග්ධනය ඵලදායී ලෙස භාවිත කර ඇති බව මැනවින් පැහැදිලි වෙයි.

MIFL හි ශක්තිමත් ණය ලබා දීමේ ක්‍රියාවලිය හේතුවෙන් සමාගමේ සමස්ත ණය කළඹ රු. බිලියන 26.95ක් දක්වා වර්ධනය වූ අතර, එය පසුගිය වසරට සාපේක්ෂව 82%ක කැපී පෙනෙන ඉහළ යාමකි. මේ අතර සමාගමේ සමස්ත වත්කම් ප්‍රමාණය ද පසුගිය වසරට සාපේක්ෂව 81%කින් ඉහළ ගොස් රු. බිලියන 30.98ක් දක්වා වර්ධනය වී ඇත. මීට අමතරව, විචක්ෂණශීලි ණය ඇගයීම් ක්‍රමවේද සහ ශක්තිමත් ණය අයකර ගැනීමේ ක්‍රියාවලිය හේතුවෙන් සමාගමේ වත්කම්වල ගුණාත්මකභාවය තවදුරටත් වර්ධනය වී ඇති අතර එහි ප්‍රතිඵලයක් ලෙස Gross Stage 3 (අක්‍රිය ණය) අනුපාතය 1.86% සිට 1.73% දක්වා අඩු කර ගැනීමට සමාගම සමත්ව ඇත.

විවිධ සන්නාමයන් යටතේ මූල්‍ය පහසුකම් සැපයීම පුළුල් කිරීමත්, ඩිජිටල් ණය පහසුකම් සහ පාරිභෝගික සේවා පහසුකම් වෙනුවෙන් සිදුකරන අඛණ්ඩ ආයෝජනයන් නිසා වඩාත් පුළුල් පාරිභෝගික පිරිසකට සේවය සැලසීමට තමන්ට හැකි වී ඇති බව MIFL සඳහන් කළේය. මෙලෙස තම ව්‍යාපාරික කටයුතු සාර්ථක කරගන්නා අතරතුර, ඉතා වගකීම් සහගතව සහ දැඩි විනයකින් යුතුව ගුණාත්මක ණය පහසුකම් සැපයීමට ද සමාගම නිරන්තරයෙන් කැපවී සිටියි.