කෘත්‍රිම බුද්ධිය මත පදනම් වූ තාක්ෂණික පරිවර්තනය ලෝක ආර්ථිකයේ සහ වෘත්තීය ලෝකයේ නව අවකාශ නිර්මාණය කරමින් සිටින යුගයක, අනාගත පරපුරේ දැනුම, නිර්මාණශීලීත්වය සහ ඩිජිටල් කුසලතා වර්ධනය කිරීම සඳහා අධ්‍යාපනයට සිදුකරන තාක්ෂණික ආයෝජන, තීරණාත්මක වැදගත්කමක් ගනී.

එම දැක්ම පෙරදැරි කරගනිමින් Techzone Kandy සහ Lenovo එක්ව මහනුවර විද්‍යාර්ථ විද්‍යාලයට නවීන AI තාක්ෂණයෙන් සන්නද්ධ පරිගණක විද්‍යාගාරයක් හඳුන්වා දී තිබේ. මෙය තාක්ෂණික උපකරණ කිහිපයක් අධ්‍යාපන පරිසරයකට එක් කිරීමකට වඩා පුළුල් වූ වැඩපිළිවෙළක් වන අතර, 21 වැනි සියවසේ කුසලතාවලින් සන්නද්ධ, තාක්ෂණය සමඟ ඉදිරියට යා හැකි නව පරපුරක් ගොඩනැංවීම සඳහා වන ආයතනික සහයෝගීතාවක් ලෙසද හඳුනාගත හැකිය.

නව විද්‍යාගාරය Lenovo All-in-One පරිගණක 10කින්, අඟල් 75ක TECHNO VIEW AI Interactive Panel එකකින්, AI කැමරාවකින් සහ නවීන විද්‍යාගාර පහසුකම්වලින් සමන්විත වේ.

මෙහි සැබෑ වටිනාකම පවතින්නේ උපකරණවල නවීනත්වය තුළ පමණක් නොව, එම තාක්ෂණය සිසුන්ගේ ඉගෙනුම් අත්දැකීම, පර්යේෂණ හැකියාව, නිර්මාණශීලීත්වය සහ අනාගත වෘත්තීය සූදානම වෙත පරිවර්තනය කළ හැකි ආකාරය තුළ ය.

Technocity (Pvt) Ltd. සභාපති මොහොමඩ් ඉස්මයිල් ෆාමි මහතා පැවසූයේ තාක්ෂණය සමඟ සිසු පරපුරට වගකීමක්ද පැවරෙන බවයි.

“අප ජීවත් වන්නේ කෘත්‍රිම බුද්ධිය වඩාත් සමීප වෙමින් පවතින යුගයකයි. තාක්ෂණය අප ඉගෙන ගන්නා, වැඩ කරන සහ අනාගතය ගොඩනඟන ආකාරය වෙනස් කරමින් තිබෙනවා. දේශීය සමාගමක් ලෙස අපගේ වගකීම වන්නේ තාක්ෂණය සැපයීමෙන් ඔබ්බට ගොස්, ඊළඟ පරම්පරාවට එය අත්විඳිමින් ඉගෙන ගැනීමට අවස්ථා නිර්මාණය කිරීම යි...” යනුවෙන් ඔහු පැවසීය.

මෙම අවස්ථාවට මධ්‍යම පළාත් ආණ්ඩුකාර ආචාර්ය හර්ෂ සුරංග ප්‍රනාන්දු මහතා, Laptop.lk අධ්‍යක්ෂ මින්හාජ් ෆාරූක්, Techzone Kandy කළමනාකරු හේමාල් චන්ද්‍රරත්න, Lenovo නියෝජිතයන් වන Naveen Kejriwal සහ Shekhar Karmakar, මධ්‍යම පළාත් අධ්‍යාපන දෙපාර්තමේන්තුවේ අතිරේක පළාත් අධ්‍යක්ෂ (සංවර්ධන) D. M. K. දසනායක, නියෝජ්‍ය අධ්‍යාපන අධ්‍යක්ෂ (සංවර්ධන, ICT) A. K. P. S. කොඩිතුවක්කු සහ මධ්‍යම පළාත් සභාවේ ප්‍රධාන ලේකම් G. H. M. A. ප්‍රේමසිංහ යන මහත්ම මහත්මීහු එක් වූහ.

බලවත් තාක්ෂණය තරුණ පරපුර අතට පත් කිරීම ඔවුන්ගේ අනාගතය නිශ්චිත කිරීමක් නොවුණද, තම හැකියාවන් සොයාගැනීමට නව මෙවලම් සහ අවකාශ ඔවුන්ට ලබා දීමකි. මෙය අනාගතය සඳහා වඩා ශක්තිමත් පදනමක් ද සපයයි. AI යුගය පැමිණ තිබේ. විද්‍යාර්ථ විද්‍යාලයේ සිසුන් දැන් එහි ඉදිරිපෙළේ සිටිති.