ගෙවී ගිය වසර 6කුත් මාස 3 ක කාලපරිච්ඡේදය තුළ දී කොළඹ කොටස් වෙළෙඳපොළ මිල දර්ශක වාර්තා වූ පහළම මට්ටම මේ වන විට වාර්තා වී තිබේ.

පසුගිය මාර්තු 21 බ්‍රහස්පතින්දා දින ගනුදෙනු අවසානයේ දී කොටස් වෙළෙඳපොළ සියලු කොටස් මිල දර්ශකය ඒකක 5,571.30 ක් ලෙසින් සටහන් වූ අතර මෙය 2012 දෙසැම්බර් 26 වනදායින් පසු වාර්තා වූ අඩුම මට්ටම ලෙසින් වාර්තා වේ. එසේම 2019 වසර තුළ දී මේ දක්වා සියලු කොටස් මිල දර්ශකයේ පහළ යාම 7.95% ක් ලෙසින් සටහන් වී ඇත.

තවද කොටස් වෙළෙඳපොළ සමාගම් අතුරින් ඉහළ ද්‍රවශීලතාවයක් හා කාර්යසාධනයක් සහිත සමාගම් 20 ඇසුරින් ගණනය කෙරෙන S&P SL20 දර්ශකය, වසර ආරම්භයේ පැවති ඒකක 3,111.07 සිට ඒකක 2,741.31 ක් දක්වා මේ වන විට පහළ ගොස් ඇත. මෙය වසර ආරම්භයේ සිට මාර්තු 21 දක්වා කාලය තුළ දී 12.56 ක පහළ යාමකි.

මේ අතර පසුගිය සතියේ කොළඹ දී පැවති ව්‍යාපාරික සංවාද සන්ධ්‍යාවක දී අග්‍රාමාත්‍ය රනිල් වික්‍රමසිංහ මහතා කියා සිටියේ, තම රජය කොටස් වෙළෙඳපොළ පිළිබඳ නිරන්තරයෙන් අවධානයෙන් පසුවන බවත්, පෙර පැවති මට්ටම්වලට කොටස් වෙළෙඳපොළ පැමිණීම සඳහා කළ යුතු දෑ බොහෝ බවත්ය. එසේම සේවක අර්ථසාධක අරමුදල යළිත් වරක් කොටස් වෙළෙඳපොළ ආයෝජන සඳහා ප්‍රවේශ වී සිටින බවද අග්‍රාමාත්‍යවරයා මෙහිදී අවධාරණය කළේය.

කෙසේ වෙතත් මෙම සාකච්ඡා සභාවේදීම අදහස් දක්වමින් මෙරට ප්‍රකෝටිපති ව්‍යාපාරික ධම්මික පෙරේරා මහතා කියා සිටියේ, සමාගම්වල ලාභ පහළ වැටෙද්දී, කොටස් වෙළෙඳපොළේ කඩාවැටීම පිළිබඳව අමුතුවෙන් කියන්න දෙයක් නොමැති බවයි. සමාගමේ වෙත පනවා ඇති බදු මීට ප්‍රධාන හේතුවක් වී ඇති බවත් බැංකු අංශයේ මෙකී බදු ප්‍රතිශතය 63% ක් බවත් ඔහු මෙහිදී කියා සිටියේය.