කොළඹ නගරය තුළ ප්‍රධාන මංසන්ධිවල ඇතිවන වාහන තදබදය අවම කිරීම සඳහා ගුවන් පාලම් පද්ධතියක් නිර්මාණය කිරීම හා සෑම ප්‍රධාන නගරයකම යාන්ත්‍රික සිරස් වාහන අංගන (vertical parking lots) පිහිටුවීමට රජය සැලසුම් කර තිබේ.

රජය විසින් ප්‍රකාශයට පත් කරන ලද 'රට හදන සෞභාග්‍යයේ දැක්ම' - ජාතික ප්‍රතිපත්ති රාමුවෙහි මේ බව සඳහන් වේ.

‘අළුත් කොළඹ - වෙළෙඳ සහ මූල්‍ය පුරවරය‘ අංශය යටතේ, 21 වන සියවසේ ‘අළුත් කොළඹ‘ ප්‍රතිපත්තියට අනුව මාර්ග තදබදය ලිහිල් කිරීමටත්, දෛනික ගමනාගමනය පහසු කිරීමටත් නවීන අධිවේගී ප්‍රවාහන පද්ධතියක් නිර්මාණය කිරීම යනුවෙන් උපාය මාර්ගයක් මෙහිදී සකස් කර තිබේ. ඊට අදාළ ක්‍රියාකාරකම් 3කි. එනම්,

• කොළඹ නගරය ආශ්‍රිත උපනාගරික ප්‍රදේශ මෙන්ම වරාය නගරය ද සම්බන්ධ කිරමින් නාගරික දුම්රිය පද්ධතියක් ස්ථාපනය කිරීම.
• තදබදය ලිහිල් කිරීම හා දෛනික ගමනාගමනය පහසු කිරීම සඳහා සැහැල්ලු දුම්රිය මාර්ග පද්ධතියක් ගොඩනැගීම.
• තනි අතට දිවෙන වටරවුම් මාර්ග ධාවන සැලැස්මක් ක්‍රියාත්මක කරන අතර ම ප්‍රධාන මංසන්ධිවල ඇතිවන වාහන තදබදය අවම කිරීම සඳහා ගුවන් පාලම් පද්ධතියක් නිර්මාණය කිරීම හා සෑම ප්‍රධාන නගරයකම යාන්ත්‍රික සිරස් වාහන අංගන පිහිටුවීම.