2022 වසරේ මැයි මස මැද දී දෛනික විචලන පරාසය හඳුන්වා දීමෙන් පසුව විනිමය අනුපාතිකයේ සමස්තයක් ලෙස පැවති ස්ථාවරත්වය 2022 වසරේ ඔක්තෝබර් මාසයේ දී ද අඛණ්ඩව පැවතුණි.

2022 වසරේ ඔක්තෝබර් මස මැද සිට මහ බැංකුව බර තැබූ සාමාන්‍ය එතැන් විනිමය අනුපාතිකයෙහි දෙපසට සමමිතික විචල්‍ය ආන්තිකය ප්‍රකාශ කිරීමත් සමඟ විනිමය අනුපාතිකය පිළිබඳ වෙළෙඳපොළ මාර්ගෝපදේශයට යම් නම්‍යශීලී බවක් ලබා දුන්නේය.

ඒ අනුව 2022 වසරේ දෙසැම්බර් මස 06 වන දින දක්වා කාලය තුළ දී ශ්‍රී ලංකා රුපියල, එක්සත් ජනපද ඩොලරයට සාපේක්ෂව සියයට 44.8ක අවප්‍රමාණයක් වාර්තා කළ ද, 2022 වසරේ මැයි මස 13 සිට මේ දක්වා, එය එක්සත් ජනපද ඩොලරයට සාපේක්ෂව සුළු අවප්‍රමාණයක් වාර්තා කර ඇත.

මේ අතර, අනෙකුත් විදේශ ව්‍යවහාර මුදල්වල හැසිරීම පිළිබිඹු කරමින්, 2022 වසරේ දෙසැම්බර් මස 06 වන දින දක්වා කාලය තුළ දී ශ්‍රී ලංකා රුපියල, යූරෝ, ස්ටර්ලින් පවුම, ජපන් යෙන්, ඕස්ට්‍රේලියානු ඩොලරයට සහ ඉන්දියානු රුපියලට සාපේක්ෂව අවප්‍රමාණය විය.