2025 දී, අවම බදු නිදහස් කිරීමක් සහිතව, දේපල බදු ක්‍රමය වෙනුවට ධන බද්දක් හඳුන්වා දීමටත්, තෑගි හා බූදල් බද්දක් හඳුන්වා දීමටත් පියවර ගන්නා බව ජනාධිපති රනිල් වික්‍රමසිංහ මහතා පවසයි.

ජාත්‍යන්තර මූල්‍ය අරමුදල සමඟ එළැඹි කාර්ය මණ්ඩල වාර්තාව පිළිබඳව ජනාධිපතිවරයා අද (22) දින පාර්ලිමේන්තුවේ දී විශේෂ ප්‍රකාශයක් කළ අතර එහිදී රජයේ ආදායම වැඩි කර ගැනීමේ සැලසුම් යටතේ ඔහු මේ බව පැවසීය

මීට අමතර රජයේ අදායම වැඩිකර ගැනීම සඳහා දියත් කර ඇති සෙසු සැලසුම් පහත පරිදි වේ.

• 2025 වන විට ප්‍රාථමික හිඟය දළ දේශීය නිෂ්පාදිතයෙන් 2.3% ක් බවට පත් කර ගැනීම.
• දළ දේශීය නිෂ්පාදිතයෙන් ප්‍රතිශතයක් ලෙස දැනට 8.3%ක්ව පවතින ශ්‍රී ලංකා රජයේ ආදායම 2026 වන විට 15% ක් දක්වා වැඩි කර ගැනීම.
• ආංශික බදු සහන නොමැතිව සංස්ථාපිත ආදායම් බදු අනුපාතය 30% ක් දක්වා වැඩි කර තිබීම.
• වැට් බදු අනුපාතය 8% සිට 15% දක්වා වැඩි කිරීමට පියවර ගැනීම.
• වැට් බදු සඳහා ලබා දී ඇති නිදහස් කිරීම් ක්‍රමානුකූලව අඩු කිරීමට, වැට් බදු ආපසු ගෙවීම් කඩිනම් කිරීමට සහ S-වැට් ක්‍රමය අහෝසි කිරීමට පියවර ගැනීම.