ජාතික තොරතුරු හා සන්නිවේදන තාක්ෂණ විසඳුම් සම්පාදක SLT-MOBITEL  පසුගියදා Prime Lands Residencies PLC සමග විශේෂ අවබෝධතා ගිවිසුමකට අත්සන් තැබී ය. මේ යටතේ කොළඹ 07 වෝඩ් පෙදෙසේ පිහිටා ඇති ‘The Grand’ අති-සුඛෝපභෝගී නිවාස සංකීර්ණයට SLT-MOBITEL Fibre සම්බන්ධතා සමගින් නවීන තොරතුරු හා සන්නිවේදන තාක්ෂණ පහසුකම් රාශියක් හිමි වේ.

SLT ප්‍රධාන ප්‍රාදේශීය ව්‍යාපාර නිලධාරී ඉමන්ත විජේකෝන් මහතා සහ Prime Lands Residencies PLC කළමනාකාර අධ්‍යක්ෂ මංජුල වීරක්කොඩි මහතා විසින් මෙම ගිවිසුමට අත්සන් තැබූ අතර, එම අවස්ථාවට දෙපාර්ශවය නියෝජනය කරමින් තවත් නිලධාරීහු පිරිසක් එක්වූහ.

අලංකාර ලෙස සැලසුම් කර, උසස් ප්‍රමිතියෙන් යුතුව ඉදිකර ඇති ‘The Grand’ නිවාස එකතුව, සුඛෝපභෝගී ජීවන රටාවන්ට සරිලන සියලු පහසුකම්වලින් සමන්විත වේ. මීටර් 167 ක උසකින් යුත් මෙම ගොඩනැගිල්ල මහල් 37 කින් සමන්විත වන අතර, විනෝදාස්වාද ක්‍රියාකාරකම් සහ විවේකය සඳහා එහි වර්ග අඩි 50,000 කට අධික ඉඩකඩක්ද වෙන්කර ඇත.

“පදිංචිකරුවන්ට සුවිශේෂී ජීවන රටා අත්දැකීමක් තිළිණ කරන සුඛෝපභෝගී නිවාස ව්‍යාපෘතියක් ලෙස ‘The Grand’ දැනටමත් විශාල ජනප්‍රියත්වයක් හිමිකරගෙන තිබෙනවා. SLT-MOBITEL සමග අත්වැල් බැඳගැනීම නිසා, මේ ජීවන රටාවන්ට ගැළපෙන නවීනතම තොරතුරු හා සන්නිවේදන තාක්ෂණ පහසුකම් රාශියක් පදිංචිකරුවන් වෙත පිරිනැමීමට අපට හැකියාව ලැබේවි.” Prime Lands Residencies PLC කළමනාකාර අධ්‍යක්ෂ මංජුල වීරක්කොඩි මහතා පැවසී ය.

“Prime Group හි ප්‍රධානතම මහල් නිවාස ව්‍යාපෘතියක් වන ‘The Grand’ සමග මේ ආකාරයට අත්වැල් බැඳගැනීමට හැකි වීම අපට මහත් සතුටක්. පාරිභෝගික රුචිකත්වයන්ගේ වෙනස්කම්වල ප්‍රතිඵලයක් ලෙස මේ වනවිට Smart තාක්ෂණයන් සහිත සුඛෝපභෝගී නිවාස බෙහෙවින් ජනප්‍රිය වී තිබෙනවා. අප සතු නවීනතම තොරතුරු හා සන්නිවේදන තාක්ෂණ පහසුකම් සහ ෆයිබර් විසඳුම් නිසා, ජාත්‍යන්තර ප්‍රමිතීන්ට අනුකූලව එවැනි නවීන තාක්ෂණික පහසුකම් සැපයීමට අපට පුළුවන්.”  SLT ප්‍රධාන ප්‍රාදේශීය ව්‍යාපාර නිලධාරී ඉමන්ත විජේකෝන් මහතා පැවසී ය.

‘The Grand’ නිවාස ව්‍යාපෘතියේ අරමුණුවලට සමගාමීව, SLT-MOBITEL සේවාවන් ඔස්සේ පුළුල් පරාසයක පැතිරුණු විශ්වාසනීය තාක්ෂණික පහසුකම් රාශියක් අත්විඳීමට එහි පදිංචිකරුවන්ට හැකියාව ලැබෙනු ඇත. නවීනතම උපකරණ හා උපාංග භාවිතයෙන් තම එදිනෙදා ජීවිත වඩාත් පහසු කරගැනීමට හා විනෝදාස්වාදය අත්විඳීමට ජනතාවට අවස්ථාව ලැබෙන ආකාරයට SLT-MOBITEL විසඳුම් හා සේවා සැලසුම් කර ඇති අතර, එමගින් ඔවුන්ට උපරිම ආරක්ෂාවක් සමගින් ඉහළ ජීවන රටාවක සතුට රිසි සේ  විඳගැනීමට අවස්ථාව හිමි වේ.

ඡායාරූපය: SLT ප්‍රධාන ප්‍රාදේශීය ව්‍යාපාර නිලධාරී ඉමන්ත විජේකෝන් මහතා සහ Prime Lands Residencies PLC කළමනාකාර අධ්‍යක්ෂ මංජුල වීරක්කොඩි මහතා ගිවිසුම හුවමාරු කරගනිමින්