ඉදිකිරීම් අංශයෙහි ශ්‍රී ලංකා ගැනුම් කළමනාකරුවන්ගේ දර්ශකය 2024 ජූනි මාසයේ දී දර්ශකාංක 59.5ක් වූ අතර, එය පසුගිය සමීක්ෂණ වාර තිහක් තුළ වාර්තා කල ඉහළම දර්ශක අගය වේ. මේ වන විට ක්‍රියාත්මකවන ඉදිකිරීම් ව්‍යාපෘති බොහොමයක් බහුපාර්ශ්වික ආයතනවල මූල්‍යාධාර මත සිදුකරන මාර්ග අළුත්වැඩියා කිරීමේ සහ ජලසම්පාදනය හා සම්බන්ධ ව්‍යාපෘතිවලින් සමන්විත වන බව සමීක්ෂණයට ප්‍රතිචාර දැක්වූ බොහෝ දෙනෙක් සඳහන් කළහ.

ඉදිරි කාලීන ඉදිකිරීම් ක්‍රියාකාරකම්වල වර්ධනයක් පෙන්නුම් කරමින් පෙර මාසයට සාපේක්ෂව ජූනි මාසයේ දී නව ඇණවුම් වැඩි වේගයකින් ඉහළ ගියේය. කෙසේ වුවද, සේවා නියුක්තිය මෙම මාසයේ දී ද අඩු වේගයකින් වුව ද පහත වැටුණි. මේ අතර, ඉදිකිරීම් ද්‍රව්‍ය සඳහා ඇති ඉල්ලුමේ වර්ධනයත් සමග තොග මිලදී ගැනීම් ජූනි මාසයේ දී ඉහළ ගියේය. තවද, බොහෝ ඉදිකිරීම් ද්‍රව්‍යවල මිල මට්ටම් අඩුවෙමින් පවතින බව සමීක්ෂණයට ප්‍රතිචාර දැක්වූ බොහෝ දෙනෙක් සඳහන් කළහ. මේ අතර, ඇණවුමක් සැපයීමට සැපයුම්කරුවන්ට ගතවන කාලය ජූනි මාසය තුළ දී තවදුරටත් වැඩි විය.