AIA ඉන්ෂුවරන්ස් ලංකා සමාගම විසින් 27 වන වතාවටත් ශ්‍රී ලංකාවේ දීර්ඝතම ආයතනික් සමාජමය මෙහෙවරක් වන AIA පොසොන් රැකවරණ ව්‍යාපෘතිය සුපුරුදු පරිදි මෙවර පොසොන් සමයේදීත් සිදු කිරීමට සියලු කටයුතු සංවිධානය කර ඇත.  ජාතික පොසොන් උත්සවය සඳහා සහභාගී වීමට පුදබිම් වෙත ගමන් ගන්නා බැතිමතුන් වැව් වලින් දිය ස්නානය කිරීමේ දී ඇතිවිය හැකි අවදානම සැලකීමට ගෙන, අනුරාධපුර, පොලොන්නරුව, දඹුල්ල සහ මිහින්තලේ  පූජා නගර සියල්ල ආශ්‍රිතව පිහිටා ඇති වැව් 22ක්  ආවරණය වන අයුරින්  දින 3ක් පුරාවට,  500 කට අධික ජීවිත ආරක්ෂක නිලධාරී මහත්වරුන්ගේ සේවය ලබා ගනිමින්  බැතිමතුන්ගේ ජීවිත වලට දියේ දී වියහැකි අනතුරු සඳහා රැකවරණ තහවුරු කර ඇත.

විශේෂයෙන්ම මෙම අභියෝගාත්මක වසර තුල දී දැනට පවතින තත්ත්වය පිටුදැකීම සඳහා  ජනතාව විසින් මව්බිම වෙනුවෙන් සෙත් පැතීම උදෙසා විශාල වශයෙන් මෙම පුදබිම් වෙත පැමිණෙනු ඇතැයි බලාපොරොත්තු වේ. මෙවරත් පොසොන් උත්සවය සඳහා වර්තමානයේ රටේ පවතින ගැටලුකාරී වාතාවරණය අතරේ වුවද විශාල බැතිමතුන් පිරිසක් පැමිණෙනු ඇතැයි අපේක්ෂා කෙරේ.

ශ්‍රී ලංකාව වැව් සහ ජලාශ රාශියකින් සමන්විත දේශයක් වන අතර මේවායින් බොහොමයක් අපට හමුවන්නේ උතුරු මද පළාත ආශ්‍රිතවයි.  පොසොන් සමය වනවිට මෙම ජලාශ පිටාර අවස්ථාවට ලඟා වනතුරු පිරී පවතින අතර පොසොන් උත්සවය සැමරීමට දිවයිනේ නන්දෙසින් පැමිණෙන බැතිමතුන්ගෙන් ද මෙම ප්‍රදේශ පිරී ඉතිරී යයි.  පුදබිම් කරා වන්දනාවේ පැමිණෙන ලක්ෂ සංඛ්‍යාත බැතිමතුන් සිය ගමන් විඩාව නිවා ගැනීමටත් උඩමළුව පූජා කිරීමට පෙර පිරිසිදු වීමටත් මෙම ප්‍රදේශ පුරා පිහිටා ඇති වැව් සහ ජලාශ වලින් ස්නානය කිරීම පිළිවෙතක් ලෙස සිදු කරයි.  මේ කරුණු  සැලකීමට ගෙන AIA ඉන්ෂුවරන්ස් ලංකා සමාගම බැතිමතුන්ගේ වටිනා ජීවිත වලට රැකවරණය සැලසීමේ අරමුණින්, වර්තමානයේ පවතින අසීරු ආර්ථික අභියෝග අතරේ වුවද, මෙම ජීවිතාරක්ෂක පොසොන් රැකවරණ ව්‍යාපෘතිය සාර්ථකව ක්‍රියාත්මක කිරීමට සියලු කටයුතු  සූදානම් කර ඇත.

AIA ඉන්ෂුවරන්ස් ලංකා සමාගමේ ප්‍රධාන විධායක නිලධාරිනී චතුරි මුණවීර මහත්මිය සිය අදහස් දක්වමින් කියා සිටියේ “මෙම ව්‍යාපෘතිය 1993 වසරේ සිට ජාතික වශයෙන් අදාළ සුවිශේෂී වැඩසටහනක් බවට පත්ව ඇති අතර පසුගිය වසර ගණනාව පුරාවට වටිනා ජීවිත 200 කට අධික ප්‍රමාණයක් බේරා ගැනීමට මේ ඔස්සේ අපට හැකියාව ලැබුනා.  පවුලක දරුවෙක්, මවක්, පියෙක් හෝ මුළු  පවුලක්ම රක්ෂා කරන සහෝදරයෙක් මෙම රැකවරණ වැඩසටහන ඔස්සේ ඒ බේරාගත් අය අතර සිටින්නට ඇති, ඒ හැම ජීවිතයක්ම ඔවුන්ගේ පවුල්වලට කෙතරම් වටිනවා ඇතිද.  මේ වසරේදීත් පවතින වර්තමාන ආර්ථික අර්බුදය අතරතුර වුවත් මෙම ජාතික වැඩසටහනට උරදීමට අප කැපවුණේ, යහපත් කාල තුලදී පමණක් නොව ජනතාව පීඩාකාරී කාලවකවානුවක් ගෙවමින් සිටින මෙම අවස්ථාවේ දී,  ඔවුන්ට අවශ්‍යම මොහොතේදී අපි ඔවුන් සමග සිටිය යුතු නිසයි ”.

1992 වසරේ දී සිදු වූ අවාසනාවන්ත වියෝවීමකින් පසුව පොසොන් උත්සව සමයේ දී, දියේ ගිලීමෙන් සිදුවන අනතුරු වළක්වාලමින් බැතිමතුන්ගේ ජීවිත සඳහා රැකවරණය තහවුරු කිරීමේ විසදුමක් ලෙස මෙම ව්‍යාපෘතිය අරඹනු ලැබුවා.  1993 වසරේ දී ශ්‍රී ලංකා ජීවිතාරක්ෂක සංගමය, ශ්‍රී ලංකා නාවික හමුදාව සහ ශ්‍රී ලංකා පොලීසිය සමගින් මෙම පොසොන් රැකවරණ ව්‍යාපෘතිය දියත් කරනු ලැබුවේ පොසොන් සමයේ දී දියේ ගිලීම නිසා සිදුවෙමින් පැවතුන විශාල අනතුරු ප්‍රමාණය වලක්වා ගැනීමේ අරමුණ ඇතිවයි.

AIA ඉන්ෂුවරන්ස් ලංකා සමාගම, අනුරාධපුර පුදබිම් වටා පිහිටා ඇති වැව් සහ ජලාශ ආශ්‍රිතව ජීවිතාරක්ෂක සේවා සැලසීමට අමතරව රැකවරණ ප්‍රචාරණ පුවරු සවිකරමින් දියට බැසීමට සුදුසු සහ නුසුදුසු ස්ථාන මෙන්ම අනතුරු වියහැකි ස්ථාන පිළිබඳව දැනුවත් කිරීමද සිදු කරයි.  අනුරාධපුර දිස්ත්‍රික්කය පුරාවට මෙම රැකවරණ පුවරු සවිකරමින් වන්දනාකරුවන් දැනුවත් කරමින් වැව් සහ ජලාශ ආශ්‍රිතව සිදුවිය හැකි අනතුරු වලක්වා ගැනීම තහවුරු කෙරෙන  අතර   AIA ඉන්ෂුවරන්ස් ලංකා සමාගම, සමාජ මාධ්‍ය හරහා ද පොසොන් උත්සවයට සහභාගී වීමට යන බැතිමතුන්හට වැව් සහ ජලාශ වලින් දිය නෑමේදී ආරක්ෂා වියයුතු ආකාරය පිළිබඳව දැනුවත්  කිරීමේ වැඩසටහනක් දියත් කර ඇත.

ශ්‍රී ලංකාවේ හොඳම ජීවිත රක්ෂණ සමාගම වශයෙන් (ප්‍රදානය කැපිටල් ෆිනෑන්ස් ඉන්ටර්නැෂනල් වෙතින්, 2021) සහ ශ්‍රී ලංකාවේ සන්නාම වෙළෙඳපොල ප්‍රමුඛ සමාගම ලෙස(ප්‍රදානය තෝට් ලීඩර්ස් ඉන්ටර්නැෂනල් වෙතින්,2021) සම්මානයෙන් පිදුම් ලද AIA ඉන්ෂුවරන්ස් ලංකා සමාගම ජාත්‍යන්තර වශයෙන් පිළිගැනීමට ලක් වූ,  ශ්‍රී ලාංකික ජනතාවගේ රැකවරණ අවශ්‍යතා සපුරාලීමට කැප වූ මෙරට තුල ඉතා ශක්තිමත්ව මුල් බැසගත් දේශීය සන්නාමයක්.  AIA පොසොන් රැකවරණ ව්‍යාපෘතිය ද සමාගම සිදු කරන්නා වූ ජාතික මෙහෙවර පිළිබිඹු වන තවත් එක් මුලපිරීමක් වන අතර මේ සියල්ල ඔස්සේ ශ්‍රී ලාංකික ජනතාවට සුවපත්, සැපවත් දිගුකල් ජීවිතයක් ගත කිරීම සඳහා සහය වීමට සමාගමෙහි ඇති කැපවීම විදහා දැක්වෙනවා.