ශ්‍රී ලංකාවේ ලිහිසි තෙල් වෙළඳපොළ ලිහිල්කරණය හා නව ප්‍රවේශකයින් තෝරා ගැනීම

1961 අංක 28 දරන ලංකා ඛනිජතෙල් නීති ගත සංස්ථා පනත සහ ඊට ආනුෂංගික සංශෝධිත  විධිවිධාන මඟින් ලිහිසි තෙල් කර්මාන්තය සඳහා ඇතුළත් වීමට අපේක්ෂිත නව අයදුම්කරුවන් තෝරා ගැනීම සඳහා සහ ඊට අනුරූපව බලපත්‍ර ලබා දීම සඳහා ඛනිජතෙල් සම්පත් සංවර්ධන විෂයභාර අමාත්‍යවරයාට බලය ලබා දී තිබේ.

ඒ අනුව ඛනිජ තෙල් වෙළෙඳපොළ පූර්ණ වශයෙන් විවෘත කර ඇත.

මේ වන විට ලංකා ඛනිජතෙල් නීතිගත සංස්ථාවද ඇතුළත්ව බලපත්‍රලාභී ආයතන 26ක් මෙරට ලිහිසි තෙල් කර්මාන්තයේ නියැලී සිටියි.

පාරිභෝගිකයින්හට වඩාත් තරගකාරී මිලකට ලිහිසි තෙල් මිල දී ගැනීමට අවස්ථාව හිමි වන පරිදි ගුණාත්මක බවින් ඉහළ, නව්‍ය හා තරගකාරීත්වයෙන් යුත් නිෂ්පාදන මෙරට වෙළඳපොළට ඇතුළු වීමට අවස්ථාව සලසා දීමට හැකි වන පරිදි ශ්‍රී ලංකාවේ ලිහිසි තෙල් වෙළඳපොළට නව  ප්‍රවේශයක් තෝරා ගැනීම සඳහා සුදුසුකම් ඉල්ලා සිටීමේ අයදුම්පත් කැඳවීම පිණිස විදුලිබල හා බලශක්ති අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.

පවතින විදේශ විනිමය හිඟය, ණයවර ලිපි විවෘත කිරීමේ අපහසුතා මෙන්ම පෙර ගෙවීමේ ක්‍රමයට අදාළ මුදල් ගෙවීමේ සීමා හේතුවෙන් කෘෂිකාර්මික කටයුතු සඳහා අත්‍යවශ්‍ය යෙදවුම් නියමිත කාලය තුළදී මෙරටට ආනයනය කිරීමට අපහසු වීම හේතුවෙන් කෘෂිකර්මාන්තය දැඩි අර්බුදයකට මුහුණ පා ඇත.

විශේෂයෙන්ම, කෘෂිකාර්මික යෙදවුම් ආනයනය කිරීමේදී එවැනි ආනයනයන්ට අදාළ සෑම ඇණවුමක් සඳහාම ආයතන කිහිපයකින් අනුමැතිය ලබා ගත යුතු වීම හේතුවෙන් අදාළ ආනයනයන් ප්‍රමාද වීම මෙන්ම අතිරේක පිරිවැයක් දැරීමට ද සිදු වන බව කෘෂිකාර්මික යෙදවුම් ආනයනකරුවන් විසින් රජයේ අවධානයට යොමු කර ඇත.

ඒ අනුව, එළඹෙන මහ කන්නයේ කෘෂීකාර්මික කටයුතු බාධාවකින් තොරව කර ගෙන යාමට හැකි වන පරිදි, හඳුනාගත් කෘෂි බීජ, කෘෂි රසායන ද්‍රව්‍ය සහ රසායනික පොහොර ආනයනය කිරීමේදී දැනට අදාළ වන පෙර ගෙවීම් සීමාව වන ඇමරිකානු ඩොලර් 50,000ක වටිනාකම ඇමරිකානු ඩොලර් 250,000ක් දක්වා වැඩි කිරීම සඳහා අවශ්‍ය පියවර ගැනීම පිණිස මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍ය වශයෙන් ජනාධිපතිතුමා විසින් ඉදිරිපත් කරන ලඳ යෝජනාව අමාත්‍ය මණ්ඩලයහ විසින් අනුමත කරන ලදී.