ආදායම් රැස්කර ගැනීම පිළිබඳව නව රජය ධනාත්මක ආකල්පයක සිටියත් 2015 වසර වෙනුවෙන් ඉදිරිපත් කර ඇති අයවැය හිඟය පවත්වා ගැනීමට ලංකාවට ඉතාමත් අසීරු වනු ඇතැයි ජාත්‍යන්තර මූල්‍ය අරමුදල අනතුරු හඟවයි.

මූල්‍ය අරමුදල පවසා තිබෙන්නේ නව රජය විසින් 2015 අයවැය මගින් හඳුන්වාදී තිබෙන එක් වරක් (one-off) පමණක් අයකරන බදු අවසන් වීමෙන් පසුව 2016 වසරේදී මෙරට රාජ්‍ය ආදායම පහළ යෑමේ හැකියාවක්ද තිබෙන බවයි.

මේ අනුව, රාජ්‍ය ආදායම් පහළ යනවිට රජයේ වර්තන වියදම් (Current Expenditure) ඉහළ යාම නිසා අයවැය හිඟයේ ඉලක්කය පවත්වා ගැනීම අසීරු වනු ඇතැයි සඳහන්ය.

2014 වසරේදී මෙරට අයවැය හිඟයේ ඉලක්කය සපුරා ගැනීමට නොහැකිවී තිබෙන බවත් රාජ්‍ය ආදායම් අඩුවීම නිසා අයවැය හිඟය දළ දේශීය නිෂ්පාදිතයට ප්‍රතිශතයක් ලෙස සියයට 06 ක් දක්වා වර්ධනය වී ඇති බවත් මූල්‍ය අරමුදල පවසා ඇත.

2013 වසරේදී මෙරට අයවැය හිඟය පවත්වා ගැනීමට ඉලක්ක කර තිබුණේ දළ දේශීය නිෂ්පාදිතයට සියයට 5.9 ක් ලෙසයි.