කොළඹ කොටස් වෙළෙඳපොළ සමස්ත වෙළෙඳපොළ ප්‍රාග්ධනීකරණ අගය මේ වන විට රු. ට්‍රිලියන 3.38 ක් දක්වා ඉහළට පැමිණ ඇත. මෙය කොටස් වෙළෙඳපොළ ඉතිහාසයේ මෙතෙක් වාර්තා වූ ඉහළම වෙළෙඳපොළ ප්‍රාග්ධනීකරණ (Market Capitalization) වටිනාකමයි.

මෙලෙස වෙළෙඳපොළ ප්‍රාග්ධනීකරණය වාර්තාගත ලෙස ඉහළ යාමත් සමඟම සමාගම් ගණනාවකම වෙළෙඳපොළ ප්‍රාග්ධනීකරණ අගයයන් ඉහළ ගොස් තිබේ. ඒ අනුව ශ්‍රී ලංකාවේ විශාලතම විවිධාංගීකරණය කරන ලද සමාගම් සමූහය වන ජෝන් කීල්ස් හෝල්ඩිංග්ස් රු. බිලියන 210.96 ක වෙළෙඳපොළ ප්‍රාග්ධනීකරණයක් වාර්තා කරමින් මෙම ලැයිස්තුවේ පළමු තැනට පත්ව සිටී. ඒ මෙතෙක් එම ස්ථානයේ රැඳී සිටි ලංකා දුම්කොළ සමාගම දෙවැනි තැනට පත්කරලමිනි. අද වන විට ලංකා දුම්කොළ සමාගමේ වෙළෙඳපොළ ප්‍රාග්ධනීකරණ අගය රු. බිලියන 208.72 ක් වේ.

මීට අමතරව වෙළෙඳපොළ ප්‍රාග්ධනීකරණය රු. බිලියන 100 සීමාව ඉක්මවා වාර්තා කර ඇති සමාගම් 5 ක් අද වන විට කොළඹ කොටස් වෙළෙඳපොළේ දක්නට ඇත. ඒ අනුපිළිවෙල අනුව ඩිස්ටිලරීස් කම්පැනි ඔෆ් ශ්‍රී ලංකා - රු. බිලියන 111.78 ක්, බ්‍රවුන්ස් ඉන්වෙස්ට්මන්ට්ස් - රු. බිලියන 107.77 ක්, LOLC හෝල්ඩිංග්ස් - රු. බිලියන 107.75 ක්, ඩයලොග් ආසියාටා - රු. බිලියන 105.44 ක් හා එක්ස්පෝලංකා හෝල්ඩිංග්ස් - රු. බිලියන 104.39 ක් වශයෙනි.

සමාගමක වෙළෙඳපොළ ප්‍රාග්ධනීකරණය ගණනය කරනුයේ සමාගමේ නිකුත් කරන ලද කොටස් ප්‍රමාණය, එම සමාගමෙහි කොටසක වෙළෙඳපොළ මිලෙහි ගුණිතයක් ලෙස ගැනීමෙනි. නිකුත් කරන ලද කොටස් ප්‍රමාණය වෙනස් නොවන විට සමාගමේ කොටස් මිල උච්ඡාවචනය වන අවස්ථාවේ දී එම සමාගමේ වෙළෙඳපොළ ප්‍රාග්ධනීකරණය ද ඉහළ පහළ යනු ඇත.

මෙලෙස කොටස් වෙළෙඳපොළේ ලැයිස්තුගත කර ඇති සියලු සමාගම්වල වෙළෙඳපොළ ප්‍රාග්ධනීකරණයෙහි එකතුව සමස්ත වෙළෙඳපොළ ප්‍රාග්ධනීකරණය වේ.

වෙළෙඳපොළ ප්‍රාග්ධනීකරණය අනුව අද (15) දිනට කොළඹ කොටස් වෙළෙඳපොළේ විශාලතම සමාගම් 25 පහත පරිදි වේ.