වාණිජ බැංකුවල පොලී අනුපාතය තීරණය වීමට බලපාන මහ බැංකුවේ ප්‍රතිපත්ති පොලී අනුපාතය මේ දෙසැම්බර් මාසයේදී වෙනස් නොකිරීමට තීරණය කර තිබෙන අතර මේ සඳහා පවතින ආර්ථික ප්‍රවණතා සැලකිල්ලට ගත්බව ශ්‍රී ලංකා මහ බැංකුව කියයි.

මේ අනුව, මහ බැංකුවේ ප්‍රතිපත්ති පොලී අනුපාත දෙසැම්බර් මාසයේදී සියයට 6.50 ක් සහ සියයට 8.00 ක් ලෙස තවදුරටත් පවත්වාගෙන යයි.

බැංකුව පවසා තිබෙන්නේ 2009 නොවැම්බර් මාසයෙන් පසුව මෙරට උද්ධමනය අඩුම අගය දක්වා පහළ ගොස් තිබෙන බවයි. ගෙවුණු ඔක්තෝම්බර් මාසයේදී මෙරට උද්ධමනය සියයට 1.6 ක් දක්වා පහළ වැටුණු අතර නොවැම්බර් මාසයේ උද්ධමනය සියයට 1.5 ක් දක්වා අඩුවී තිබේ.

බැංකුව පවසා තිබෙන්නේ ලෝක වෙළඳ පොළේ ඛනිජ තෙල් මිල පහළ යාම හමුවේ උද්ධමනය ඉදිරියේදී අඩු අගයක පවතිනු ඇතැයි උපකල්පනය කරන බවයි.

පසුගිය ඔක්තෝම්බර් මාසයේදී බැංකු ක්‍රමයෙන් පුද්ගලික අංශය ලබාගත් ණය ප්‍රමාණය සියයට 5.1 කින් වර්ධනය වී තිබෙන අතර එම වර්ධනය රුපියල් බිලියන 42 කි.

මේ වසරේ මුල් මාස 09 තුළදී රාජ්‍ය අංශය බැංකු වලින් ලබාගත් ශුද්ධ ණය රුපියල් බිලියන 87.3 කින් වැඩිවෙද්දී රාජ්‍ය සංස්ථා විසින් ලබාගත් ශුද්ධ ණය ප්‍රමාණය රුපියල් බිලියන 1.2 කින් අඩුවී තිබීම කැපී පෙනේ.

මේ වනවිට, බැංකු පොලී අනුපාත අඩු මට්ටමක තිබෙන හෙයින් පුද්ගලික අංශය බැංකු වලින් ලබාගන්නා ණය වර්ධනය වී තිබේ.