ජපාන ජාත්‍යන්තර සහයෝගිතා නියෝජිතායතනයේ (JICA) මූල්‍ය අනුග්‍රහය යටතේ ක්‍රියාත්මක වන විදුලි සම්ප්‍රේෂණ ජාල සංවර්ධන වැඩසටහන යටතේ, කිලෝවෝල්ට් 132ක (132 kV) විදුලි සම්ප්‍රේෂණ රැහැන් මාර්ගයක් ඉදිකිරීම සඳහා වූ ටෙන්ඩරයේ අවම ලංසුකරු ලෙස විදුල්ලංකා පීඑල්සී (Vidullanka PLC) සහ ඉන්දියාවේ ස්කිපර් ලිමිටඩ් (Skipper Limited) යන සමාගම්වලින් සමන්විත ඒකාබද්ධ ව්‍යාපාරය තේරී පත්වී ඇත.

"ජාතික සම්ප්‍රේෂණ සහ බෙදාහැරීමේ ජාල සංවර්ධන සහ කාර්යක්ෂමතාව ඉහළ නැංවීමේ ව්‍යාපෘති පැකේජය 3 (දෙවන අදියර)" ලෙස නම් කර ඇති මෙම ව්‍යාපෘතියේ ප්‍රධාන කොන්ත්‍රාත්කරු Natiolal T'ransmission Network Service Provider (NTNSP)/ Ceylon Electricity Board (CEB) වේ. කිලෝවෝල්ට් 132ක විදුලි සම්ප්‍රේෂණ රැහැන් මාර්ග සහ ඊට අදාළ කාර්යයන් ඉදිකිරීම, සවි කිරීම, පරීක්ෂා කිරීම සහ කොමිෂන් කිරීම මෙම ව්‍යාපෘතියේ විෂය පථයට අයත් වේ.

මෙම ව්‍යාපෘතියේ සමස්ත ලංසු වටිනාකම ආසන්න වශයෙන් රුපියල් බිලියන 5.0 ක් (රුපියල් මිලියන 5,000 ක්) වන අතර, කොන්ත්‍රාත්තුව ආරම්භ කළ දින සිට මාස 18 ක කාලයක් ඇතුළත ව්‍යාපෘතිය නිම කිරීමට ඇස්තමේන්තු කර ඇත. අවම ලංසුකරු ලෙස තේරී පත්වුවද, ව්‍යාපෘතියේ අවසාන කොන්ත්‍රාත්තුව පිරිනැමීම තාක්ෂණික ඇගයීම් සම්පූර්ණ කිරීම සහ විදුලිබල මණ්ඩලයෙන් ලැබෙන ප්‍රදාන ලිපිය (Letter of Award - LOA) මත පදනම් වේ.

අවශ්‍ය ප්‍රසම්පාදන සහ කොන්ත්‍රාත් විධිවිධාන සම්පූර්ණ කිරීමෙන් පසුව, විදුල්ලංකා පීඑල්සී සමාගම සිය විදේශීය සන්ධාන සහකරු වන ස්කිපර් ලිමිටඩ් සමාගම හා එක්ව දේශීය ක්‍රියාත්මක කිරීමේ සහ ව්‍යාපෘති කළමනාකරණ කටයුතු භාරව කටයුතු කරනු ඇත.