සමාගමේ ජාතික දිගුකාලීන ණය ශ්‍රේණිය ෆිච් රේටින්ග්ස් විසින් පහළ දැමීමට අදාළව ජෝන් කීල්ස් හෝල්ඩින්ග්ස් පී.එල්.සී. සමාගම (JKH) අදහස් දක්වා තිබේ. ජෝන් කීල්ස් යනු මෙරට දැවැන්තම ආයෝජකයෙකු බවත් සමාගම විසින් කර්මාන්තවල සිදුකරන වර්තමාන ආයෝජනයන් යුද්ධයෙන් පසු නැගී එන මෙරට ආර්ථික වර්ධනය හමුවේ ඉහළ වර්ධනයක් අපේක්ෂිත ඒවා බව සඳහන්ය. මේවා සම්බන්ධ අවධානම් හා ප්‍රතිලාභ පිළිබඳව සමාගම හොඳින් අධ්‍යනය කර ඇතැයි ජෝන් කීල්ස් මෙහිදී පවසා තිබේ.

විශේෂයෙන්ම සංචාරක, පාරිභෝගික භාණ්ඩ සහ සිල්ලර, දේපොළ සහ මූල්‍ය සේවා යන අංශයන්හි ප්‍රතිලාභ ඉහළ ආයෝජනයන් කිරීමට සමාගම පසුගිය අවුරුදු 10 ක කාලය තුළදී කටයුතු කර තිබෙන බව සඳහන්ය.

ප්‍රවාහන ව්‍යාපාරික කටයුතුවල කාර්ය සාධනය බලාපොරොත්තු වූ පරිදිම මධ්‍යස්ථභාවයට පැමිණ තිබුණත් SAGT පර්යන්තයේ වත්මන් කාර්ය සාධනය සමූහයේ බාධා අනුපාතයන්ට (Hurdle Rates) වඩා අඛණ්ඩවම ඉහළින් තිබෙන බව සමාගම සඳහන් කර ඇත.

2014 මාර්තු මාසයේදී ආරම්භකළ වෝටර් ෆ්‍රන්ට් හෝටල් ව්‍යාපෘතියේ නේවාසික ඒකක සහ වාණිජ ඉඩකඩ ඉදිකිරීමට පෙර අලෙවි කිරීම, බලාපොරොත්තු වූවාට වඩා සාර්ථකවී අපේක්ෂිත මට්ටමට වඩා ඉහළින් තිබෙන බව සමාගම පවසා තිබේ. මෙහිදී, ජෝන් කීල්ස් අවධාරණය කර තිබෙන්නේ සමූහයේ වත්මන් හා අපේක්ෂිත මූල්‍ය ශක්තිය ඕනෑම අවිනිශ්චිත තත්ත්වයකට මුහුණ දීමට ඇති තරම් ප්‍රමාණවත් බවයි.