කාන්තා ව්‍යවසායිකාවන් සඳහාම වෙන්වූ ශ්‍රී ලංකාවේ සහ දකුණු ආසියානු කලාපයේ ප්‍රථම විලාසිතා සතිය වන “CCWE විලාසිතා සතිය සහ ජාත්‍යන්තර සමුළුව 2026” (CCWE Fashion Week & International Summit 2026) නිල වශයෙන් ප්‍රකාශයට පත් කිරීම කොළඹදී පැවති මාධ්‍ය හමුවකදී සිදුවිය. ලංකා කාන්තා ව්‍යවසායිකාවන්ගේ මණ්ඩලය (CCWE) විසින් මෙහෙයවනු ලබන මෙම සුවිශේෂී ජාතික වැඩසටහන, කාන්තා ව්‍යවසායිකාවන් උදෙසාම වෙන්වූ දකුණු ආසියානු කලාපයේ පළමු විලාසිතා ප්‍රදර්ශනය ලෙස ද සැලකේ.

“Threads of Inclusion Woven from Every Walk of Life” යන තේමාව යටතේ පැවැත්වෙන මෙම ප්‍රදර්ශනය 2026 ජූලි 16 සිට 20 දක්වා කොළඹ Cinnamon Life හිදී පැවැත්වීමට නියමිතය. මෙමගින් තිරසාර සහ විවිධත්වයට ගරු කරන විලාසිතා ක්ෂේත්‍රයක් තුළ ශ්‍රී ලංකාව ලෝකයේ ප්‍රමුඛ ස්ථානයකට රැගෙන එන අතරම, කාන්තාවන්ගේ ආර්ථික සහ සමාජයීය පරිවර්තනය සඳහා ප්‍රබල වේදිකාවක් ද නිර්මාණය කරනු ඇත.

විලාසිතා ප්‍රදර්ශනයකට එහා ගිය මෙම සුවිශේෂී වැඩසටහන විවිධ ක්ෂේත්‍රවල සහ කලාපවල, ව්‍යාපාරවල නියැලී සිටින කාන්තාවන් සවිබල ගන්වමින් සමාජයට අර්ථවත් සේවයක් ඉටු කිරීමට අපේක්ෂා කරයි. නිර්මාණකරුවන්, සුළු හා මධ්‍ය පරිමාණ ව්‍යවසායකයින්, ප්‍රතිපත්ති සම්පාදකයින්, ආයෝජකයින් සහ ජාත්‍යන්තර පාර්ශවයන් එකම වහලක් යටට ගෙන ඒම මගින්, නව වෙළඳපොළ අවස්ථා උදාකර දීමටත්, මූල්‍ය පහසුකම් පුළුල් කිරීමටත් සහ තිරසාර ජීවනෝපායන් සඳහා සහාය වීමටත් මෙහිදී මූලිකත්වය ලබා දේ. තවද, කාන්තා ව්‍යාපාරිකාවන්ගේ අපනයන හැකියාවන් වර්ධනය කිරීම හා ඔවුන්ගේ නිෂ්පාදන අපනයනය කිරීමට උපකාර කිරීම, නිර්මාණාත්මක ක්ෂේත්‍රයන් සඳහා තරුණියන් දිරිමත් කිරීම සහ දකුණු ආසියානු කලාපය තුළ සහයෝගීතාවය වර්ධනය කිරීම හරහා මෙරට ආර්ථික සංවර්ධනයට සක්‍රීය දායකත්වයක් ලබාදීම මෙම ප්‍රදර්ශනයේ ප්‍රධාන අරමුණයි.

ප්‍රමුඛ පෙළේ සමාගම් රැසකගේ සහයෝගය ඇතිව ක්‍රියාත්මක වන මෙම වැඩසටහනෙහි ප්‍රධාන අනුග්‍රාහකයා ලෙස HNB කටයුතු කරයි. කාන්තාවන් ආර්ථික වශයෙන් ශක්තිමත් කිරීම සහ ඒ හරහා රටේ දියුණුව උදෙසා කැපවීමට ඇති සාමූහික කැපවීම මෙම සහයෝගීතාවය මගින් පෙන්නුම් කරයි.

මාධ්‍ය හමුව අමතමින් CCWE සභාපතිනී සහ විලාසිතා සතියේ සභාපතිනී ආචාර්ය අයන්ති ගුරුසිංහ මහත්මිය සඳහන් කළේ “මෙය හුදෙක් ප්‍රදර්ශනයක් පමණක්ම නොවේ; මෙය මෙරට කාන්තා ව්‍යවසායිකාවන් දෙස බලන ආකාරය වෙනස් කරන වැදගත් ජාතික මට්ටමේ වැඩසටහනක්. ඕනෑම තරාතිරමක කාන්තාවකට තම සහජ දක්ෂතා ව්‍යාපාරයක් බවට පත් කිරීමටත්, නව වෙළඳපොළ අවස්ථා සොයා ගැනීමටත්, ඒ හරහා මෙරට ආර්ථිකයට දායකත්වයක් ලබා දීමටත් මේ හරහා අවස්ථාව සැලසෙනවා. මෙම වැඩසටහන හරහා, සැමට සමාන අවස්ථා හිමි වන අනාගතයක් ගොඩනැගීමට සහ එ හරහා කලාපයේ පෙරමුණ ගැනීමට ශ්‍රී ලංකාවට මහඟු අවස්ථාවක් හිමිවනු ඇතැයි මා විශ්වාස කරනවා.” යනුවෙනි.

HNB කළමනාකාර අධ්‍යක්ෂ/ප්‍රධාන විධායක නිලධාරී දමිත් පල්ලේවත්ත මහතා අදහස් දක්වමින් පැවසුවේ “වසර 135කට අධික කාලයක් පුරාවට HNB සියලු ශ්‍රී ලාංකිකයින්ගේ ප්‍රගතියේ සහකරු ලෙස කැපවී සිටින අතර, කාන්තා ව්‍යවසායිකාවන් සවිබල ගැන්වීම අපගේ එම මෙහෙවරෙහි ප්‍රධාන අංගයක්- මෙම වැඩසටහන හරහා කාන්තාවන්ට වෙළඳපොළ අවස්ථා විවර කර ගැනීමටත්, සාර්ථක ව්‍යාපාර ගොඩනගමින් මෙරට ආර්ථික සංවර්ධනයට අර්ථවත් දායකත්වයක් ලබා දීමටත් හැකියි. කාන්තාවන්ට නිසි මගපෙන්වීම සහ පහසුකම් ලැබුණු විට, එහි යහපත් ප්‍රතිඵල ඔවුන්ගේ පවුලට පමණක් නොව, සමස්ත සමාජයට මෙන්ම සමස්ත ආර්ථිකයටම හිමි වනවා. මෙහි ප්‍රධාන අනුග්‍රාහකයා ලෙස එක්වීමට අපි ගත් තීරණය මූල්‍ය සහ ව්‍යාපාරික සේවාවන් හරහා ඔවුන්ගේ දිගුකාලීන දියුණුව උදෙසා අපගේ අඛණ්ඩ කැපවීම පෙන්නුම් කරන්නක්.” යනුවෙනි.

“CCWE විලාසිතා සතිය සහ ජාත්‍යන්තර සමුළුව 2026 යනු අප කලාපයේ කාන්තා ව්‍යවසායිකාවන් සතු ශක්තිය සහ හැකියාවන් මනාව විදහා දක්වන සුවිශේෂී පියවරක්. සැමට සම අවස්ථා සහ සහයෝගීතාවය හිමිවන මෙවැනි වැඩසටහනක් නිර්මාණය කිරීමට ශ්‍රී ලංකාව පෙරමුණ ගැනීම අගය කළ යුතුයි. ඒකායන අරමුණක් වෙනුවෙන් එක්ව කටයුතු කරමින් කාන්තාවන් සවිබල ගැන්වීම සඳහා CCWE සමඟ අත්වැල් බැඳ ගැනීමට ලැබීම SAWDF ගෞරවයක් කොට සලකනවා.” යනුවෙන් මෙම වැඩපිළිවෙල සඳහා කලාපීය සහයෝගය දක්වමින්, දකුණු ආසියානු කාන්තා සංවර්ධන සංසදයේ (SAWDF) සභාපතිනී ප්‍රමිලා ආචාර්යා මහත්මිය අන්තර්ජාලය ඔස්සේ එක්වෙමින් අදහස් දැක්වූවාය-

මීට අමතරව මෙම වැඩසටහනෙහි Knowledge Partner ලෙස එක්සත් ජාතීන්ගේ ආසියා ශාන්තිකර කලාපීය ආර්ථික හා සමාජ කොමිසම (ESCAP-SSWA) කටයුතු කරයි. එහි ප්‍රධානී සහ අධ්‍යක්ෂිකා මිකිකෝ ටනාකා මහත්මිය අදහස් දක්වමින් මෙසේ පැවසුවාය. “2026 CCWE විලාසිතා සතිය සහ ජාත්‍යන්තර සමුළුව 2026 හි Knowledge Partner ලෙස එක් වීමට ලැබීම ගැන අපට සතුටුයි. කාන්තා ව්‍යවසායිකාවන්ට අවශ්‍ය ව්‍යාපාරික අවස්ථා, මූල්‍ය පහසුකම් සහ ඩිජිටල් තාක්ෂණය ලබා දීම සඳහා අපගේ ඒකායන කැපවීම මෙම වැඩසටහන හරහා මනාව පෙන්නුම් කරනවා.” යනුවෙන්

2026 දකුණු ආසියානු කාන්තා නායකත්ව සම්මාන උළෙලෙහි (South Asian Women Leadership Awards 2026) සභාපතිනී ආශා ජයමාන්න මහත්මිය මෙම ප්‍රදර්ශනයේදී සුවිශේෂී කාර්යභාරයක් ඉටු කරනු ලබයි. ඇයගේ මූලිකත්වය යටතේ, කලාපීය මට්ටමින් කාන්තා නායකත්වය ඇගයීමට ලක් කිරීම සහ ඔවුන්ට ජාත්‍යන්තර පිළිගැනීමක් ලබා දීම මෙම වැඩසටහනේ ප්‍රධාන අංගයක් වනු ඇත.

මෙම විලාසිත දැක්මෙහි නිර්මාණාශීලීත්වය තවදුරටත් ශක්තිමත් කරමින්, ප්‍රවීණ නර්තන වින්‍යාස ශිල්පී ගිහාන් දසනායක මහතා මෙම විලාසිතා දැක්ම මෙහෙයවීමට එක්වීමට නියමිතය. සිය කලාත්මක හැකියාවන් සහ ක්ෂේත්‍රයේ අත්දැකීම් උපයෝගී කරගනිමින්, විවිධත්වය සහ සහයෝගීතාවය විදහා දක්වන ජාත්‍යන්තර තලයේ ආකර්ෂණීය විලාසිතා පෙළහරක් ඔහු ඉදිරිපත් කරනු නොඅනුමානය.

2026 CCWE විලාසිතා සතිය සහ ජාත්‍යන්තර සමුළුව, මෙරට නිර්මාණාත්මක ක්ෂේත්‍රයන් ප්‍රවර්ධනය කරමින් සහ සුළු හා මධ්‍ය පරිමාණ ව්‍යවසායකයන්ට නව අවස්ථා උදාකර දෙමින් රටට දිගුකාලීන ප්‍රතිලාභ රැසක් අත්කර දෙනු ඇතැයි අපේක්ෂා කෙරේ. එපමණක් නොව රජය සහ පෞද්ගලික අංශය අතර සහයෝගීතාවය වර්ධනය කිරීම මෙන්ම ආර්ථිකයේ තීන්දු තීරණ ගන්නා කැපී පෙනෙන නායිකාවන් ලෙස පෙරමුණ ගැනීමට කාන්තා දායකත්වය ශක්තිමත් කිරීමද මෙහි තවත් අරමුණකි.