මොරටුව විශ්වවිද්‍යාලය හා ධම්මික හා ප්‍රිසිලා පෙරේරා පදනමේ ඩී.පී. එඩියුකේෂන් (DP Education) එක්ව, මොරටුව විශ්වවිද්‍යාලයේ මාර්ගගත ඉගෙනුම් වේදිකාව වන open.uom.lk ඔස්සේ දියත් කරන පුහුණු ෆුල් ස්ටැක් ඩිවලොපර් (Trainee Full Stack Developer) පාඨමාලාව යුරෝපා විද්‍යුත් ඉගෙනුම් සමුළුව මඟින් ප්‍රදානය කරන විද්‍යුත් ඉගෙනුම් විශිෂ්ටතා සම්මාන (European E-learning excellence awards) උළෙලේ 2022 වසරේ ප්‍රථම ස්ථානය දිනාගැනීමට සමත්විය. මෙම සමුළුව පවත්වනු ලබන්නේ බ්‍රිතාන්‍යයේ අන්තර්ජාතික අධ්‍යාපනික සමුළු (Academic Conferences International UK) නමැති අධ්‍යාපනය පිළිබඳ ගෝලීය පර්යේෂණ ආයතනය විසිනි.

“Trainee - Full Stack Developer”, නොමිලේ පවත්වනු ලබන ශ්‍රී ලංකාවේ ප්‍රථම සහ එකම මාර්ගගත මෘදුකාංග නිපැයුම් ඉංජිනේරු පාඨමාලාව, 2022 පෙබරවාරි මාසයේදී ඩී.පී. එඩියුකේෂන් සමඟ එක්ව මොරටුව විශ්වවිද්‍යාලය විසින් දියත් කරන ලදී. මෙම පාඨමාලාව මඟින් මෘදුකාංග නිපැයුම් වල නියැලීමට අවශ්‍ය මූලික අඩිතාලම විධිමත්ව ලබා දෙනු ලබයි. අද වන විට, මෙම පාඨමාලාව බඳවා ගැනීම් 170,000 ක් ඉක්මවා ඇති අතර සිංගප්පූරුව, ඇමරිකා එක්සත් ජනපදය සහ එක්සත් රාජධානිය වැනි රටවලින් 11,000 කට ආසන්න පරිශීලකයින් ප්‍රමාණයක් මේ සමඟ සම්බන්ධ වී ඇත. මෙම පාඨමාලාව Python for Beginners, Python Programming, Web Design for Beginners, Frontend Web Development, Server-Side Web Programming, and, Professional Practices in Software Development යනාදි මොඩියුල හයකින් සමන්විත වන අතර මෙම පාඨමාලාව සාර්ථකව නිම කරන්නන් වෙනුවෙන් මොරටුව විශ්ව විද්‍යාලයේ විවෘත හා දුරස්ථ අධ්‍යාපන කේන්ද්‍රය, ඉංජිනේරු පීඨයේ පරිගණක විද්‍යා හා ඉංජිනේරු විද්‍යා දෙපාර්තමේන්තුව හා තොරතුරු තාක්ෂණ පීඨයේ තොරතුරු තාක්ෂණ දෙපාර්තමේන්තුව විසින් නිකුත්කරන ඊ-සහතිකපත් හිමිවේ.

මෙම විද්‍යුත් ඉගෙනුම් විශිෂ්ඨතා සම්මානය දිනාගැනීම, මොරටුව විශ්වවිද්‍යාලයේ උපකුලපති මහාචාර්ය එන්.ඩී. ගුණවර්ධන මැතිතුමන්, මොරටුව විශ්වවිද්‍යාලයේ හිටපු උපකුලපති මහාචාර්ය මලික් රණසිංහ මැතිතුමන්, මොරටුව විශ්වවිද්‍යාලයේ විවෘත හා දුරස්ථ අධ්‍යාපන කේන්ද්‍රයේ අධ්‍යක්ෂිකා මහාචාර්ය විශාකා නානායක්කාර මැතිනිය හා මෙරට දැවැන්ත ව්‍යාපාරිකයෙකු හා මානවහිතවාදියෙකු වන ධම්මික හා ප්‍රිසිලා පෙරේරා පදනමේ සම-නිර්මාතෘ සහ සභාපති ධම්මික පෙරේරා මැතිතුමන්ගේ නොමිලේ ගුණාත්මක අධ්‍යාපනය සියල්ලන්ටම ලබාදීමේ ප්‍රයත්නයේ සාර්ථකත්වය සනාථ කරවන්නකි. එමෙන්ම මේ සියලු ජයග්‍රහන ව්‍යාපෘතිය අරඹා වසරකට වඩා අඩු කාලයක් තුළ ලබාගත් ඒවා වීම විශේෂ වේ.

යුරෝපා විද්‍යුත් ඉගෙනුම් සමුළුවේ පසුගිය වසරවල ජයග්‍රාහකයන් වන්නේ, කැනඩාවේ Web-Based Dementia Care Partner Education using the iGeriCare ව්‍යාපෘතිය (2021), හොංකොන් හි Ekkehard Altenburger සහ Hong Kong Baptist විශ්ව විද්‍යාලය නිර්මාණය කළ Lab/Skill based learning under COVID-19 ව්‍යාපෘතිය (2020) සහ බ්‍රිතාන්‍යය සහ ඕස්ට්‍රේලියාව එක්ව නිර්මාණය කළ Transforming Professional Learning with Mobile Technologies ව්‍යාපෘතිය (2019) වේ.

Trainee Full Stack Developer පාඨමාලාව සඳහා පිවිසීමට  https://open.uom.lk/ වෙත පිවිසෙන්න.