ශ්‍රී ලංකාවේ සංචාරක හා ආගන්තුක සත්කාර අධ්‍යාපනය සඳහා වූ ප්‍රමුඛතම රජයේ ආයතනය වන ශ්‍රී ලංකා සංචාරක හා හෝටල් කළමනාකරණ ආයතනය (SLITHM), සිය 45 වැනි උපාධි ප්‍රදානෝත්සවය පසුගිය දා කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ (BMICH) දී අභිමානවත් අයුරින් පවත්වනු ලැබීය.

මෙම උත්සවයේ ප්‍රධාන ආරාධිත අමුත්තා ලෙස අග්‍රාමාත්‍ය ආචාර්ය හරිනි අමරසූරිය මහත්මිය සහභාගී වූ අතර, සංචාරක නියෝජ්‍ය අමාත්‍ය මහාචාර්ය රුවන් රණසිංහ මහතා ගෞරවනීය ආරාධිත අමුත්තා ලෙස එක්විය. එමෙන්ම ශ්‍රී ලංකා හෝටල් පාසල් උපාධිධාරීන්ගේ සංගමයේ සභාපති ආචාර්ය ගීතාංජලී චක්‍රවර්ති මහත්මිය, SLITHM සභාපති ධීර හෙට්ටිආරච්චි මහතා, SLITHM අධ්‍යක්ෂ ජනරාල් වසන්ත මන්ත්‍රිපාල මහතා, හෝටල් ක්ෂේත්‍රයේ ප්‍රවීණයන්, ප්‍රමුඛ පෙළේ හෝටල් සමූහයන්හි සාමාන්‍යාධිකාරීවරුන් සහ ශ්‍රී ලංකාවේ සංචාරක හා ආගන්තුක සත්කාර ක්ෂේත්‍රය නියෝජනය කරන විශේෂ ආරාධිතයින් රැසක් මෙම අවස්ථාවට සහභාගී වූහ.

1964 වසරේ සිලෝන් හෝටල් පාසල ලෙස ආරම්භ වූ SLITHM, අද වන විට විශ්වවිද්‍යාල ප්‍රතිපාදන කොමිෂන් සභාව (UGC) විසින් පිළිගත් උපාධි ප්‍රදානය කිරීමේ ආයතනයක් ලෙස වර්ධනය වී ඇති අතර, හෝටල්, නිවාඩු නිකේතන, ගුවන් සේවා, නෞකා සංචාරක සේවා සහ ජාත්‍යන්තර ආගන්තුක සත්කාර ආයතන සඳහා වාර්ෂිකව පුහුණු වෘත්තිකයන් 6,000කට අධික පිරිසක් බිහි කරයි. දිවයින පුරා පිහිටි ප්‍රාදේශීය විද්‍යාල ජාලය හරහා සියලු පළාත්වල තරුණ තරුණියන්ට සංචාරක අධ්‍යාපනය සඳහා සමාන ප්‍රවේශයක් ලබාදීමට ද මෙම ආයතනය කටයුතු කරයි.

මෙවර උපාධි ප්‍රදානෝත්සවයේදී උපාධිධාරීන් 71 දෙනෙකුගේ ජයග්‍රහණ ඇගයීමට ලක් කෙරුණු අතර, ඔවුන් ශ්‍රී ලංකාව තුළ මෙන්ම ජාත්‍යන්තර ගමනාන්තයන්හි ද සේවය කරන SLITHM හි ගෞරවනීය ආදි ශිෂ්‍ය ජාලයට එක්විය. ඔවුන්ගේ මෙම සාර්ථකත්වය ඔවුන්ගේ කැපවීම, දෙමාපියන්ගේ සහ පවුල්වල සහයෝගය මෙන්ම SLITHM හි අධ්‍යයන හා පරිපාලන කාර්ය මණ්ඩලයේ කැපවීම ද පිළිබිඹු කරයි.

අග්‍රාමාත්‍යවරිය සිය දේශනයේදී උපාධිධාරීන්ට සුබපැතුම් එක් කරමින්, රජයේ ජාතික සංචාරක ප්‍රතිපත්තියේ මූලික අරමුණක් වන මානව සම්පත් සංවර්ධනයේ වැදගත්කම අවධාරණය කළාය. එමෙන්ම, දශක හයකට අධික කාලයක් පුරා ක්ෂේත්‍රයට සූදානම් වෘත්තිකයන් බිහි කිරීමේ SLITHM හි උරුමය සහ 2030 ශ්‍රී ලංකා සංචාරක දැක්මට අදාළ ඉලක්ක වන සංචාරකයින් මිලියන 5ක් ආකර්ෂණය කර ගැනීම, ඇමෙරිකානු ඩොලර් බිලියන 10ක ආදායමක් උපයා ගැනීම සහ 800,000ක සංචාරක ශ්‍රම බලකායක් ගොඩනැගීම සඳහා එම ආයතනය ඉටු කරන ප්‍රමුඛ කාර්යභාරය ද ඇය අවධාරණය කළාය.

සංචාරක නියෝජ්‍ය අමාත්‍ය මහාචාර්ය රුවන් රණසිංහ මහතා, ශ්‍රී ලංකාව ආගන්තුක සත්කාරයේ විශිෂ්ටත්වය සඳහා ජාත්‍යන්තරව දිනාගෙන ඇති කීර්තිනාමය තවදුරටත් ශක්තිමත් කිරීම සඳහා SLITHM විසින් ඉටු කරන දීර්ඝකාලීන දායකත්වය අගය කළ අතර, නිපුණතා සංවර්ධනය, නවෝත්පාදනය සහ ජාත්‍යන්තර තරගකාරිත්වය ප්‍රවර්ධනය කරන ආයතන සඳහා අමාත්‍යාංශයේ අඛණ්ඩ සහයෝගය ලබාදෙන බව ද යළි තහවුරු කළේය.

SLITHM හි 45 වැනි උපාධි ප්‍රදානෝත්සවය, තරුණ පරපුර සවිබල ගැන්වීම, සංචාරක අධ්‍යාපනයේ ප්‍රගතිය ඉදිරියට ගෙන යාම සහ ශ්‍රී ලංකාවේ ආගන්තුක සත්කාර ක්ෂේත්‍රයේ අනාගතය හැඩගැස්වීම සඳහා එම ආයතනය ඉටු කරන සුවිශේෂී මෙහෙවර නැවත වරක් සනාථ කළ අවස්ථාවක් විය.