ස්මාර්ට් ජංගම දුරකතන සොරකම් අවම කිරීමේ අරමුණෙන් කැලිෆෝනියාව තුළ අලෙවි කරන ස්මාර්ට් ජංගම දුරකතන වලට නව ආරක්ෂාකාරී උපාංගයක් එක්කළ යුතු බවට නව නීතියක් සම්පාදනය කර තිබේ.

නීති මගින් හඳුන්වා දී තිබෙන මෙම උපාංගය “kill switch” නමින් හඳුන්වන අතර එය ජංගම දුරකතන සමාගම් විසින් 2015 ජූලි මාසයෙන් පසුව කැලිෆෝනියාවේ අලෙවිකරන ස්මාර්ට් ජංගම දුරකතන සඳහා හඳුන්වා දිය යුතුය.

ස්මාර්ට් ජංගම දුරකතනයක් සොරකම් කළ විට මෙම උපාංගය මගින් එහි දත්ත සැබෑ අයිතිකරුවාට දුර බැහැර සිට වුවත් මකා දැමිය හැකි අතර එම දුරකතනය අවශ්‍ය නම් අක්‍රීය කර දැමීමට වුවද පුළුවන.
“kill switch” නැමති මෙම උපාංගය මෘදුකාංගයක් වන අතර දුරකතනය අක්‍රීය කර දැමීමෙන් පසුව නැවත පණ ගැන්විය හැක්කේ නිවැරදි නම හා රහස් කේත භාවිතා කිරීමෙන් පසුවයි.