December, 7, 2021
ශ්‍රී ලංකාවේ ගෘහ හා පුද්ගලික සත්කාර ක්ෂේත්‍රයේ ප්‍රමුඛතම සමාගමක් වන හේමාස් කන්සියුමර් විසින් හරිත ශ්‍රී ලංකාවක් උදෙසා වූ අරමුණු වෙත සිය දායකත්වය ලබා දෙමින්, ශ්‍රී ලංකා වැසි වනාන්තර සුරකින්නෝ සමඟ සහයෝගීතාවයකට එළඹ ඇත. මෙම සුවිශේෂී හවුල්කාරීත්වය හරහා පාරිසරික අර්බුද රැසකට විසඳුම් සපයමින් අක්කර 15ක භුමි භාගයක රුක් රෝපණ කටයුතු සිදු කිරීමට නියමිතයි. මෙම හවුල්කාරීත්වය සඳහා අත්සන් තැබීමේ නිල උත්සවය මෑතකදී හේමාස් කන්සියුමර් ප්‍රධාන කාර්යාලයේදී පැවැත්විණි. මෙම ව්‍යාපෘතියේ දිගුකාලින ප්‍රධාන මෙහෙයුම්කරුවන් ලෙස හේමාස් කන්සියුමර්හි ප්‍රමුඛ සන්නාම ද්විත්වයක් වන බේබි ෂෙරමි සහ කුමාරිකා ක්‍රියා කරන අතර, අනාගත පරම්පරාවන් උදෙසා වන සංරක්ෂණයේ වැදගත්කම අවධාරණය කිරීමට ඔවුන් කැප වී ක්‍රියා කරයි.
මෙම ව්‍යාපෘතියේ එක් පියවරක් ඉදිරියට යමින් බේබි ෂෙරමි සහ කුමාරිකා, ශ්‍රී ලංකා වැසි වනාන්තර සුරකින්නෝ සමඟ එක්ව ගස් 15,000ක සිටුවීමේ බලංගොඩ වන රෝපණ ව්‍යාපෘතිය 2021 නොවැම්බර් 12 වන දින ගස් දහසක් සිටුවා ආරම්භ කරන ලදී. හේමාස් කන්සියුමර් බ්‍රෑන්ඩ්ස් , Atlas Axillia හි ස්වේච්ජා සේවකයන් අතින් මෙය සාර්ථකව සිදු විය. හේමාස් Outreach පදනමේ ග්‍රීන් ක්ලබ් ශ්‍රී ලංකා වැසි වනාන්තර සුරකින්නෝ, වන සංරක්ෂණය කරන්නන්, අදාළ බෙදා හරින්නන්, භූමි පාලකයන්, සිල්ලර වෙළෙන්ඳන් සහ ගම්මාන සමඟ කණ්ඩායම් සහයෝගී ප්‍රයන්තයකට එක් වෙමින් ඔවුන් සියලු දෙනා ගස් සිටුවීම සඳහා දායකත්වය ලබා දෙන ලදි.
අස්මාරා මන්නන් පෙරේරා මහත්මිය "මෙසේ ගස් සිටුවීම මෙම ව්‍යාපෘතියේ එක් අදියරක් පමණයි . මෙම වනාන්තර කලාපයේ නැවත වන වගාව තුළින් මෙම ප්‍රදේශයට ආවේණික ශාක දෙකක් වන ඇටඹ සහ බිං කොහොඹ යන ශාක ආරක්ෂා කර ගැනීමට හැකි වීම පිළිබඳ අපි සතුටට පත් වෙනවා. අපගේ සුන්දර රටේ ජෛව විවිධත්වය, සංරක්ෂණය සහ ආවේණික ජීවී විශේෂ රැක ගැනීම සඳහා අපි කැප වී සිටින්නෙමු" යනුවෙන් මෙම වැඩසටහන පිළිබඳව සිය අදහස් දක්වා සිටියාය.
ජෛව විවිධත්ව හා ජල පෝෂක සංරක්ෂණ හා වන සංරක්ෂක නිශාන්ත එදිරිසිංහ මහතා මෙම ව්‍යාපෘතිය පිළිබඳව සිය අදහස් දැක්වූයේ "රජවක ප්‍රදේශය සෑම විටම ලැව් ගිනිවල බලපෑමට ලක් වෙනවා, මෙම ව්‍යාපෘතිය නව ගස් සහ වනාන්තර වැඩීමට පමණක් නොව පවතින වනාන්තර ප්‍රදේශ රැක ගැනීමට ද උපකාර කරනවා, ප්‍රදේශයට ආවේණික වූ ශාක සහ සතුන් විශේෂ රැක ගැනීමට ද මෙම ව්‍යාපෘතිය උපකාර කරනවා, මෙවන් ව්‍යාපෘති ඔස්සේ මෙම ප්‍රදේශවලට විඳීමට සිදු වන දුෂ්කරතා පිළිබඳව වඩාත් හොඳින් දැනුවත් වීමට තවත් නිලධාරීන් දිරිමත් කරනු ඇත. මෙම ව්‍යාපෘතිය ආරම්භ කිරීම වෙනුවෙන් හේමාස් කන්සියුමර් බ්‍රෑන්ඩ්ස් සහ ශ්‍රී ලංකා වැසි වනාන්තර සුරකින්නෝ වෙත මම ඉතාමත් ස්තූතිවන්ත වන අතර, අනාගතයේ දී සහයෝගීව කටයුතු කිරීමට අපි අපේක්ෂා කරනවා" යනුවෙනි.
ශ්‍රී ලංකා වැසි වනාන්තර සුරකින්නන් යනු, ශ්‍රී ලංකාවේ වන විමර්ශන, වන සංරක්ෂණ දැනුවත් කිරීමේ ව්‍යාපාර, වන සංරක්ෂණ සහ ප්‍රතිසංස්කරණ කටයුතු සහ වනාන්තර ආරක්ෂා කිරීම සඳහා සඳහා කැප වෙමින් සිටින ස්වේච්ඡා සේවකයන් සහ අනුග්‍රාහකයන් පිරිසකි. ලාභ නොලබන පාරිසරික සංවිධානයක් වන මොවුන් සිංහරාජ සහ කන්නෙලිය වැසි වනාන්තර ඇතුළු පරිසර පද්ධති කිහිපයක් සහ එහි පර්යන්ත වැසි වනාන්තර ආරක්ෂා කිරීමට ක්‍රියාකාරීව නිරත වී ඇත.
බේබි ෂෙරමි සහ කුමාරිකා ශ්‍රී ලංකාවේ වැසි වනාන්තර සුරකින්නෝ සමඟ එක්ව කටයුතු කරයි. ඉදිරි අනාගතය වෙනුවෙන් වන සංරක්ෂණය සහ වනාන්තර ප්‍රදේශ ප්‍රතිසංස්කරණ කටයුතු සිදු කිරීම සඳහා තවත් බොහෝ ව්‍යාපෘති බිහි වීමට මෙම මුල පිරීම උත්ප්‍රේරකයක් වනු ඇතැයි අපේක්ෂාවෙන් මෙම ව්‍යාපෘතිය විසින් දිගු කාලීන ප්‍රයත්නයන් මෙහෙයවීමට කටයුතු කරයි.
කීර්තිමත් පුද්ගලික සත්කාර සන්නාමයන් වන බේබි ෂෙරමි සහ කුමාරිකා යන සන්නාම ද්විත්වයම සෞඛ්‍ය සම්පන්න ජීවන සංකල්පයේ පුරෝගාමීන් සහ ප්‍රජාව විසින් මෙහෙයවන මුල පිරීම් වෙනුවෙන් කැප වී ඇත.
Video Story
