බලශක්ති අමාත්‍යාංශය සහ ශ්‍රී ලංකා ආයෝජන මණ්ඩලය (BOI) එක්ව දිවයින පුරා හරිත හයිඩ්‍රජන් සහ හරිත ඇමෝනියා ව්‍යාපෘති සංවර්ධනය සඳහා සහභාගී වන ලෙස දේශීය හා ජාත්‍යන්තර ආයෝජකයින්ට ආරාධනා කරමින්, තොරතුරු සඳහා ඉල්ලීමක් (RFI)  නිකුත් කර ඇති අතර මෙය ශ්‍රී ලංකාව සිය බලශක්ති භූ දර්ශනය පරිවර්තනය කිරීම වෙනුවෙන් ගත් නිර්භීත පියවරක් ලෙස දැකිය හැක.

2026 අප්‍රේල් 23 වන දින නිකුත් කරන ලද RFI, රටේ පිරිසිදු බලශක්ති ගමනේ තීරණාත්මක අවස්ථාවක් සනිටුහන් කරයි. මෙමගින් නැගී එන හරිත හයිඩ්‍රජන් කලාපීය බලාගාරයක් ලෙස ශ්‍රී ලංකාව ස්ථානගත කිරීමට  ඇති හැකියාවත් ඊට සමාන්තරව දැවෙන දේශීය බලශක්ති අභියෝගවලට කාර්යක්ෂමව මුහුණ දිමට අවස්ථාවක් උදා කරන  බව නිලධාරීන්ගේ මතයයි.

ශ්‍රි ලංකාවේ බලශක්ති අංශය මිලියන ගණනක්  නිවාස සහ කර්මාන්ත සඳහා විදුලිය සපයන අතර, ජාතික ආර්ථිකයේ  කොඳුනාරටිය ලෙස ක්‍රියාත්මක වේ. ශ්‍රී ලංකාව එහි වත්මන් බලශක්ති සංකලනයෙන් ඔබ්බට සිය  දැක්ම මේ වන විට ඔසවා තබා ඇත.  2030 විට පුනර්ජනනීය බලශක්ති ප්‍රභවයන්ගෙන් 70% ක් ජනනය කිරීමට සහ 2050 වන විට විදුලිබල උත්පාදනයේද  පූර්ණ වශයෙන් පොසිල ඉන්ධන  භාවිතයෙන්  ඉවත් වීම රජයේ ඉලක්කය වී ඇත.

මෙම දැක්ම සාක්ෂාත් කර ගැනීම සඳහා කේන්ද්‍රීය වන්නේ 2023 දී  ප්‍රකාශයට පත් කරන ලද ශ්‍රී ලංකාවේ ජාතික හයිඩ්‍රජන් මාර්ග සිතියමයි. එය සමෘද්ධිමත් හරිත හයිඩ්‍රජන් ආර්ථිකයක් ගොඩනැගීම සඳහා මුහුද ආශ්‍රිතව බහුල සුළං බලශක්තිය සහ සූර්ය සම්පත් උපයෝගී කර ගැනීම සඳහා උපායමාර්ගික මාවතක් දක්වා ඇත. එම මාර්ග සිතියම මූලික අභිලාෂයන් දෙකක් හඳුනා ගනී: එනම් ජාතික බලශක්ති ආරක්ෂාව ශක්තිමත් කිරීම සහ හරිත හයිඩ්‍රජන් සහ හරිත ඇමෝනියා නිෂ්පාදනය සහ අපනයනය සඳහා කලාපීය මධ්‍යස්ථානයක් ලෙස ශ්‍රී ලංකාව ස්ථාපිත කිරීමයි.

2030 වන විට හරිත බලශක්ති වටිනාකම් දාමයෙන් ඇමරිකානු ඩොලර් බිලියනයක වාර්ෂික අපනයන ආදායමක් උපයා ගැනීමට ශ්‍රී ලංකාව ඉලක්ක කරයි. පුනර්ජනනීය බලශක්ති විභවය ප්‍රක්ෂේපිත දේශීය ඉල්ලුම ඉක්මවා යනු ඇතැයි ඇස්තමේන්තු කර ඇති බැවින්, ආසියාව සහ ඉන් ඔබ්බට අධික බලශක්ති ඉල්ලුමක් ඇති වෙළද පොළවල්  සඳහා පිරිසිදු-දැවෙන ඉන්ධන සැපයීමට රට අද්විතීය ලෙස ස්ථානගත කල හැකි බව බලධාරීන් විශ්වාස කරයි.

පුනර්ජනනීය ප්‍රභවයන්ගෙන් ලැබෙන විදුලිය භාවිතයෙන් ජල අංශු විභේදනය කිරීමෙන්  නිපදවන හරිත හයිඩ්‍රජන් - සහ හරිත හයිඩ්‍රජන් වලින් සංස්ලේෂණය කරන ලද හරිත ඇමෝනියා, නැව්ගත කිරීම, වානේ නිෂ්පාදනය, පොහොර නිෂ්පාදනය සහ බර ප්‍රවාහනය වැනි කාබන්ඩයොක්සයිඩ් කර්මාන්ත සඳහා තීරණාත්මක ඉන්ධන ලෙස වැඩි වැඩියෙන් පිළිගැනේ. ශ්‍රී ලංකාව ප්‍රධාන සමුද්‍රීය මාර්ග ඔස්සේ පිහිටීම අපනයන මධ්‍යස්ථානයක් ලෙස එහි ආකර්ෂණය තවදුරටත් වැඩි කරයි.

නිෂ්පාදන පහසුකම්, ගබඩා යටිතල පහසුකම්, අපනයන පර්යන්ත සහ හරිත හයිඩ්‍රජන් සංරචක නිෂ්පාදනය යන සම්පූර්ණ වටිනාකම් දාමය ආවරණය වන පරිදි ඉහළ මට්ටමේ ව්‍යාපෘති සංකල්ප සඳහා උනන්දුව ප්‍රකාශ කරන ලෙස සුදුසුකම් ලත් ආයෝජකයින්, සංවර්ධකයින් සහ ව්‍යාපෘති ක්‍රියාකරුවන්ට මෙම RFI තුලින් ආරාධනා කරයි.

බලශක්ති අමාත්‍යාංශය සහ ආයෝජන මණ්ඩලය ඒකාබද්ධව මේ සම්බන්ධව ලැබෙන ප්‍රතිචාර ඇගයීමට ලක් කරනු ලැබේ. ඒ අනුව පිළිවෙලින් තාක්ෂණික ශක්‍යතාව සහ ආයෝජන යෝජනාවලින්  තක්සේරු කිරීම කරනු ඇත.  මෙම ක්‍රියාවලියට ගිව්සුම්ගත බැදීමක්  සේ සැලකෙන්නේ නැත. එය ශ්‍රී ලංකා රජය විසින් ටෙන්ඩර්, දීමනාවක් හෝ ගිවිසුම්ගත පොරොන්දුවක් ඇති නොකරයි.  එය වෙළඳපල රුචිය මැනීමට, ප්‍රතිපත්ති රාමු තවදුරටත් සංවර්ධනය කිරීමට සහ අනාගත ව්‍යුහගත හවුල්කාරිත්වයන් සඳහා අඩිතාලම දැමීමට සැලසුම් කර ඇත.

පවත්නා නීති සහ රෙගුලාසි වලට යටත්ව, මූල්‍ය සහ මූල්‍ය නොවන දිරිගැන්වීම්, යටිතල පහසුකම් සහාය සහ නියාමන විධිමත් කිරීම ඇතුළුව අදාළ ආයෝජන රාමු යටතේ ආයෝජන මණ්ඩලය පහසුකම් සැපයීමෙන් සුදුසුකම් ලත් ව්‍යාපෘතිවලට ප්‍රතිලාභ ලැබිය හැකිය.

RFI කවුළුව දැනටමත් 2026 අප්‍රේල් 23 සිට 2026 ජුනි 5 දක්වා විවෘතව පවතී. උනන්දුවක් දක්වන පාර්ශවයන්ට බලශක්ති අමාත්‍යාංශයේ වෙබ් අඩවියෙන් (energymin.gov.lk) හෝ BOI හි ආයෝජන ද්වාරයෙන් (investsrilanka.com) නිල RFI පෝරමය බාගත කළ හැකිය. සියලුම ඉදිරිපත් කිරීම් ඉංග්‍රීසි භාෂාවෙන්, පැහැදිලිව ව්‍යුහගත කර ඇති අතර අවශ්‍ය ආධාරක ලියකියවිලි සමඟ ඉදිරිපත් කළ යුතුය.

සම්පූර්ණ කරන ලද පෝරම 2026 ජුනි 5 වන දින (ශ්‍රී ලංකා වේලාවෙන්) ප.ව. 3:00 ට පෙර amalir@boi.lk විද්‍යුත් ලිපිනයට හෝ BOI හි ආයෝජන ප්‍රවර්ධන සහ පර්යේෂණ දෙපාර්තමේන්තුව, 19 වන මහල, බටහිර කුළුණ, ලෝක වෙළඳ මධ්‍යස්ථානය, කොළඹ 01 වෙත සෘජුවම ප්‍රතිචාර දැක්වීමේදී ඉදිරිපත් කළ යුතුය. "RFI - ශ්‍රී ලංකාවේ හරිත හයිඩ්‍රජන්/ඇමෝනියා ව්‍යාපෘති සංවර්ධනය - [සමාගම/පුද්ගල නාමය]" යන මාතෘකාව භාවිතා කරන ලෙස ප්‍රතිචාර දක්වන්නන්ගෙන් ඉල්ලා සිටී.

වැඩිදුර විමසීම් සඳහා, BOI හි ආයෝජන ප්‍රවර්ධන දෙපාර්තමේන්තුව amalir@boi.lk හෝ manojc@boi.lk හි සම්බන්ධ කර ගත හැකිය.

රජය විසින් ප්‍රතිචාර දක්වන සියළු පාර්ශවකරුවන්ගේ විස්තර, දැඩි රහස්‍යභාවයකින් සලකුණු ලබන අතර, ඒවා අභ්‍යන්තර ඇගයීම් සහ සැලසුම් කටයුතු සඳහා පමණක් භාවිතාා කරන බවට සහතික කර ඇත.  ශක්තිමත් උපාය මාර්ගික සහ වාණිජමය පෙලගැස්මක් පෙන්නුම් කරන පාර්ශයන්ට පසු කාලීනව ද්විපාර්ශිකව සාකච්ඡා  හෝ අනාගත ව්‍යුහගත සම්බන්ධතා සඳහා  ආරාධනා කරනු ඇත.

කෙසේ වෙතත්, මෙම RFI යටතේ තොරතුරු ඉදිරිපත් කිරීම රජයට කිසිදු මූල්‍ය හෝ ගිවිසුම්ගත බැඳීමක් ඇති නොකරන බව නිලධාරීන්  අවධාරණය කරයි.  පූර්ව දැනුම්දීමකින් තොරව ඕනෑම ඉදිරිපත් කිරීමක් පිළිගැනීමට, ප්‍රතික්ෂේප කිරීමට හෝ වෙනස් කිරීමට හෝ RFI සම්පූර්ණයෙන්ම අවලංගු කිරීමට බලධාරීන්ට අයිතිය ඇත.