ශ්‍රී ලංකා ආයෝජන මණ්ඩලය (BOI) සතු පූර්ණ විධායක බලතල ක්‍රියාවට නංවමින්, එය රටේ ආයෝජන ප්‍රවර්ධනය භාර ප්‍රධානතම රාජ්‍ය ආයතනය බවට පරිවර්තනය කරන බව එහි නව අධ්‍යක්ෂ ජනරාල් ආචාර්ය සුලක්ෂණ ජයවර්ධන මහතා පවසයි. ඒ මහතා මේ බව ප්‍රකාශ කළේ ශ්‍රී ලංකා ආයෝජන මණ්ඩලයේ නව අධ්‍යක්ෂ ජනරාල්වරයා ලෙස නිල වශයෙන් රාජකාරි ආරම්භ කරමිනි.

ආයෝජන මණ්ඩලයට හිමි පෙර පැවැති බලතල ද මැනවින් උපයෝගී කරගනිමින්, දේශීය හා විදේශීය ආයෝජකයන් වෙත වඩාත් කඩිනම්, විනිවිදභාවයෙන් යුත් සහ ගුණාත්මක සේවාවක් සපයන ආයතනයක් බවට පත් කිරීම සිය අරමුණ බව ඔහු අවධාරණය කළේය.

වර්තමාන ගෝලීය ආයෝජන විභවයන් හඳුනා ගනිමින්, ජාත්‍යන්තර මට්ටමෙන් තරඟ කළ හැකි ශ්‍රී ලංකාවේ ප්‍රමුඛතම රාජ්‍ය ආයතනය ලෙස ආයෝජන මණ්ඩලය ඔසවා තැබීම උදෙසා වූ ආයතනික පරිවර්තනය කඩිනම් කිරීමට මේ වන විටත් අවධානය යොමු කර ඇති බව ද අධ්‍යක්ෂ ජනරාල්වරයා සඳහන් කළේය.

වැඩ භාරගැනීමේ අවස්ථාවේදී අදහස් දැක්වූ ආචාර්ය සුලක්ෂණ ජයවර්ධන මහතා මෙසේ ද පැවසීය,
"පසුගිය මාස කිහිපය තුළ වැඩබලන සභාපතිවරයා ලෙස විධායක නොවන අධීක්ෂණ මට්ටමක සිට, මෙතැන් සිට අධ්‍යක්ෂ ජනරාල්වරයා ලෙස සෘජු විධායක නායකත්වයකට පිවිසීම මාගේ රාජකාරි ජීවිතයේ තීරණාත්මක හැරවුම් ලක්ෂ්‍යයක්. සෘජු සහ තීරණාත්මක ක්‍රියාකාරීත්වයක් කරා ගමන් කිරීම මට පැවරී ඇති ප්‍රධාන අභියෝගයයි. ආයෝජන ප්‍රවර්ධනය සඳහා වන සාම්ප්‍රදායික ප්‍රවේශයන් මූලික වශයෙන් නැවත සිතා බැලිය යුතු තීරණාත්මක සන්ධිස්ථානයක මේ වන විට ආයෝජන මණ්ඩලය පසුවෙනවා.

අපගේ ක්ෂණික අවධානය යොමු වන්නේ ආයතනයේ අභ්‍යන්තර ක්‍රියාවලීන් විධිමත් කිරීමටයි. ගෝලීය සහ දේශීය ආයෝජකයන් මුහුණ දෙන බාධා ඉවත් කිරීමටත්, ආයෝජන මණ්ඩලය සතු ප්‍රමුඛ ආර්ථික හැකියාවන් නැවත ස්ථාපිත කිරීමටත් සුදුසුම අවධියට අප පැමිණ තිබෙනවා. ඒ වෙනුවෙන් සියලු පාර්ශවයන් ඒකාබද්ධ කරගනිමින්, අභියෝග ජයගෙන නියමිත ඉලක්ක සපුරා ගැනීමට මා අපේක්ෂා කරනවා."

ඔහු වැඩිදුරටත් පෙන්වා දුන්නේ, දශක ගණනාවක පරිපාලන පළපුරුද්ද නවීන, ඩිජිටල්කරණය වූ සහ තිරසාර කාර්මික රාමුවක් සමඟ පෙළගැස්වීම මඟින් සිව්වන කාර්මික විප්ලවයට (Industry 4.0) පූර්ණ ලෙස සූදානම් වූ ව්‍යාපාරික පරිසර පද්ධතියක් ගොඩනැඟිය යුතු බවයි. ශ්‍රී ලංකාව මේ වන විට පසුවන්නේ විභවයන් (Potential) ප්‍රායෝගික කාර්ය සාධනයක් (Performance) බවට පත් කරමින්, රටට දිගුකාලීන ආර්ථික ඔරොත්තු දීමේ හැකියාවක් ලබා දෙන ඉහළ වටිනාකමකින් යුතු සෘජු විදේශ ආයෝජන (FDI) අත්‍යවශ්‍යම අවධියක බව ද හෙතෙම ප්‍රකාශ කළේය.

ආචාර්ය සුලක්ෂණ ජයවර්ධන මහතා වසර 23කට අධික කැපී පෙනෙන රාජ්‍ය සේවයක් හිමි, ශ්‍රී ලංකා පරිපාලන සේවයේ (SLAS) විශේෂ ශ්‍රේණියේ නිලධාරියෙකි. ඔහු ප්‍රතිපත්ති සම්පාදනය, මහා පරිමාණ ව්‍යාපෘති කළමනාකරණය, මූල්‍ය කළමනාකරණය සහ රාජ්‍ය පරිපාලනය පිළිබඳ සුවිශේෂී පළපුරුද්දක් ලබා ඇත. ඔහුගේ විශිෂ්ට සේවා ඉතිහාසය විදුලිබල හා බලශක්ති ක්ෂේත්‍රය වෙනුවෙන් සිදුකළ දශක දෙකකට අධික පරිවර්තනීය දායකත්වයකින් සමන්විත වේ. ප්‍රධාන උපායමාර්ගිකයෙකු ලෙස ඔහු විදුලිබල ක්ෂේත්‍රයේ ප්‍රතිසංස්කරණ, පුනර්ජනනීය බලශක්ති සංවර්ධනය, ග්‍රාමීය විදුලි පාරිභෝගික සේවා සහ බලශක්ති සංරක්ෂණය වැනි තීරණාත්මක ජාතික මුලපිරීම් සඳහා නායකත්වය දුන් අතර, රටේ බලශක්ති ක්ෂේත්‍රය පාලනය කරන වැදගත් නියාමන රාමු සකස් කිරීමට ද දායක විය.

යටිතල පහසුකම්වලින් ඔබ්බට, මානව සම්පත් සංවර්ධනය, අඛණ්ඩතාව සහ ශක්තිමත් පාර්ශවකරුවන්ගේ සම්බන්ධීකරණය කෙරෙහි දැඩි අවධානයක් යොමු කරමින් සංකීර්ණ රාජ්‍ය අංශයේ ව්‍යාපෘති මෙහෙයවීමට ඔහුගේ නායකත්වය නිරන්තරයෙන් සමත් වී ඇත. මෙම බහුවිධ ක්‍රියාකාරී හැකියාව ශක්තිමත් ශාස්ත්‍රීය පදනමකින් තවදුරටත් තහවුරු වේ. ඔහු ආචාර්ය උපාධියක් (PhD), ශ්‍රී ජයවර්ධනපුර විශ්වවිද්‍යාලයෙන් ව්‍යාපාර අධ්‍යයනය පිළිබඳ පශ්චාත් උපාධියක් (Master’s) සහ පේරාදෙණිය විශ්වවිද්‍යාලයෙන් විද්‍යාවේදී (BSc) උපාධියක් ලබා ඇත.

අධ්‍යක්ෂ ජනරාල්වරයා ලෙස ආචාර්ය ජයවර්ධන මහතා සාම්ප්‍රදායික උපදේශන භූමිකාවකින් මිදී, සෘජු විදේශ ආයෝජන (FDI) ආකර්ෂණය කර ගැනීමේ එදිනෙදා යාන්ත්‍රණයන් මෙහෙයවන සක්‍රීය විධායකයෙකු බවට පත්වේ. ප්‍රධාන විධායක නිලධාරියා ලෙස ඔහුට පැවරුණු බලතල මඟින් ආයෝජන මණ්ඩලයට නිලධාරීවාදී ප්‍රමාදයන් කඩිනමින් මඟහරවා ගැනීමටත්, ආයෝජන සබඳතා ප්‍රශස්ත කිරීමටත්, ගෝලීය වේදිකාව තුළ ශ්‍රී ලංකාව තරඟකාරී කේන්ද්‍රස්ථානයක් ලෙස දැඩි ලෙස ප්‍රවර්ධනය කිරීමටත් අවස්ථාව සැලසේ. ආචාර්ය ජයවර්ධනයන්ගේ පැමිණීම සිදුවන්නේ ඩිජිටල් ලෙස සක්‍රීය වූ, තිරසාර සහ Industry 4.0 සඳහා සූදානම් ව්‍යාපාරික පරිසර පද්ධතියක් ගොඩනැඟීම කෙරෙහි ආයෝජන මණ්ඩලය සිය අවධානය යොමු කර ඇති තීරණාත්මක මොහොතක ය.