ජාතික තොරතුරු හා සන්නිවේදන තාක්ෂණ විසඳුම් සම්පාදක  SLT-MOBITEL, 2023 ජාතික ව්‍යාපෘති කළමනාකරණ විශිෂ්ටත්ව සම්මාන උළෙලේදී සම්මාන පහකින් පිදුම් ලැබීමට සමත් විය. තාක්ෂණය හා නවෝත්පාදනය ඔස්සේ සැබෑ පරිවර්තන උදෙසා පෙරමුණ ගැනීම වෙනුවෙන් SLT-MOBITEL වෙත මෙම සම්මාන හිමි විය. ව්‍යාපෘති කළමනාකරණ ආයතනයේ ශ්‍රී ලංකා ශාඛාව විසින් සංවිධානය කරන ලද මෙම සම්මන්ත්‍රණය හා සම්මාන උළෙල පසුගියදා කොළඹ කිංස්බරි හෝටලයේදී පැවැත්විණි.

ව්‍යාපෘති කළමනාකරණ ආයතනයේ ශ්‍රී ලංකා ශාඛාව යනු ඇමරිකා එක්සත් ජනපදයේ ව්‍යාපෘති කළමනාකරණ ආයතනයේ මෙරට නිල නියෝජිත ආයතනයයි. මෙම ව්‍යාපෘති කළමනාකරණ ආයතනය ව්‍යාපෘති, වැඩසටහන් සහ ආයතනික කටයුතු කළමනාකරණ වෘත්තීන් සම්බන්ධ ලොව ප්‍රමුඛතම ආයතනය ලෙස සැලකේ.

රොබෝ තාක්ෂණය, කෘතිම බුද්ධිය, දුරකථන සන්නිවේදනය, අධ්‍යාපනය, පර්යේෂණ, කෘෂිකර්මය සහ පශු සම්පත් සංවර්ධනය වැනි විවිධ අංශ තුළ අත්කරගත් කැපී පෙනෙන ප්‍රගතිය වෙනුවෙන් SLT-MOBITEL වෙත මෙම සම්මාන හිමි විය.

‘Raccoon AI Solution’ වෙනුවෙන් මෙම සම්මාන උළෙලේ ‘Best Managed Project in Robotics and Artificial Intelligence’ කාණ්ඩයේ ජයග්‍රහණය හිමි කරගැනීමට SLT-MOBITEL හි The Embryo Innovation Center සමත් විය. මෙම නව්‍ය ව්‍යාපාර බුද්ධි තොරතුරු (Business Intelligence-BI) වේදිකාව Machine Learning සහ Predictive Analytics තාක්ෂණයන භාවිතා කරමින් සමාගම් හා ආයතනවලට සිය දත්ත විශ්ලේෂණය තුළින් ඉදිරි ක්‍රියාමාර්ග සම්බන්ධයෙන් වැදගත් තීරණවලට එළඹීම සඳහා අත්වැලක් සපයයි. විවිධ රටා සහ ප්‍රවණතා හඳුනාගනිමින් අනාගත ප්‍රවණතා සම්බන්ධ පුරෝකථන ඉදිරිපත් කිරීමේ හැකියාව එහි algorithms සතුවන අතර, එමගින් ව්‍යාපාරවලට දැනුවත්භාවයෙන් යුතුව  තීරණ ගනිමින් තම මෙහෙයුම් ප්‍රශස්ත කරගැනීමට හැකියාව ලැබේ.

එමෙන්ම ‘Omnichannel Experience for Customers and Customer Touch Points‘ නම් ව්‍යාපෘතිය වෙනුවෙන් SLT-MOBITEL වෙත මෙම සම්මාන උළෙලේ ‘Best Managed Project in Telecommunications Sector’ කාණ්ඩයේ ජයග්‍රහණය හිමි විය. මෙය විවිධ සන්නිවේදන නාලිකා ඔස්සේ පාරිභෝගික සම්බන්ධතාවලට  නව අර්ථකථනයක් ලබාදීමට සමත් වූ ව්‍යාපෘතියකි.

සම්මාන උළෙලේ ‘Best Managed Project in Academic/Education and/or Research Sector’ කාණ්ඩයේ ජයග්‍රහණයද තමන් සතු කරගැනීමටද SLT-MOBITEL සමත් විය. අනාගත රැකියා වෙළඳපොළට ගැළපෙන අධ්‍යාපනික වැඩසටහන් ක්‍රියාත්මක කිරීමට අවශ්‍ය යටිතල පහසුකම් සංවර්ධන කටයුතු සාර්ථකව ක්‍රියාවට නැංවීමට SLT-MOBITEL හි කුසලතා සංවර්ධන මධ්‍යස්ථාන සමත් වීම වෙනුවෙන් මෙම ජයග්‍රහණය හිමි විය.. මෙය SLT-MOBITEL අධ්‍යාපනය උදෙසා ලබාදෙන ප්‍රමුඛත්වය තහවුරුකරන තවත් එක් සාක්ෂියකි මීට අමතරව, ජාතික ජල සම්පාදන හා ජලාපවහන මණ්ඩලය වෙනුවෙන් සම්බන්ධතා මධ්‍යස්ථාන විසඳුමක් ලබාදීමේ ව්‍යාපෘතිය වෙනුවෙන් SLT-MOBITEL වෙත ‘Best Managed Project in Government Sector’ කාණ්ඩයේ දෙවැනි ස්ථානය හිමි විය. මෙම විසඳුම හේතුවෙන් ජල සම්පාදන හා ජලාපවහන මණ්ඩලයට පැය 24 පුරා ක්‍රියාත්මකවන සහය සේවාවක ඔස්සේ පාරිභෝගිකයන්ට වඩාත් විශිෂ්ට සේවාවක් ලබාදීමට හැකි වී තිබේ.

තවද ‘Fazenda Smart Agro Solution’ වෙනුවෙන් ‘Best Managed Project in Agriculture and Livestock Development Sector’ කාණ්ඩයේ දෙවැනි ස්ථානය දිනාගැනීමටද SLT-MOBITEL සමත් විය. මෙම ඩිජිටල් විසඳුම මගින් ගොවීන්ට සිය වගා නිරීක්ෂණය කරමින්, පොහොර යෙදීම සම්බන්ධයෙන් වඩාත් නිවැරදි තීරණ ගැනීමට හැකියාව ලැබේ.

නවෝත්පාදනය හා තාක්ෂණික දියුණුව උදෙසා SLT-MOBITEL දක්වන කැපවීමට මෙම සම්මාන මනා සාක්ෂියකි. මෙම ඇගයුම් සියල්ල, ශ්‍රී ලංකාවේ තාක්ෂණ ක්ෂේත්‍රයේ පුරෝගාමියෙකු ලෙස SLT-MOBITEL සතු කීර්ති නාමය තවදුරටත් තහවුරු කරනු ඇත.

ඡායාරූප: SLT-MOBITEL නියෝජිතයන් 2023 ජාතික ව්‍යාපෘති කළමනාකරණ විශිෂ්ටත්ව සම්මාන උළෙලේදී හිමි වූ සම්මාන පිළිගනිමින්