SLTC පර්යේෂණ විශ්වවිද්‍යාලය විසින් පිරිනැමෙන පශ්චාද් උපාධි පාඨමාලා අතරට තවත් සුවිශේෂී පාඨමාලාවක් එක් කරමින් එම විශ්වවිද්‍යාලය විසින් ව්‍යාපාර පරිපාලන ශාස්ත්‍රපති (MBA) උපාධි පාඨාමාලාවක් හඳුන්වාදීම පසුගියදා සිදු කෙරිණි. 100% ක්ම SLTC පර්යේෂණ විශ්වවිද්‍යාලය හරහාම ප්‍රදානය කෙරෙන මෙම MBA පාඨමාලාව ශ්‍රී ලාංකික වෘත්තිකයින් හට සිය වෘත්තීය ගමන සාර්ථක කරගැනීමට අවශ්‍ය දැනුම හා දක්ෂතා ලබාදෙන ආකාරයට නිර්මාණය කර ඇති, විශ්වවිද්‍යාල ප්‍රතිපාදන කොමිසම (UGC) සහ අධ්‍යාපන අමාත්‍යංශයේ අනුමැතිය ලබා ඇති පාඨමාලාවකි. වෘත්තිකයින්ට හැදෑරීමට වඩාත් පහසු වන ආකාරයට නම්‍යශීලී අධ්‍යයන ක්‍රමවේදයන් මත පදනම් වන මෙම MBA පාඨමාලාව පර්යේෂණ, අධ්‍යයන හෝ ව්‍යාපෘති යන ආකාර තුනෙන් කැමති ආකාරයකට සම්පූර්ණ කිරීමට සිසුන් හට අවස්ථාව හිමි වීම විශේෂත්වයකි.

මෙම MBA පාඨාමාලාව නිල වශයෙන් දියත් කිරීමේ අවස්ථාව පසුගියදා කොළඹ 01, TRACE Expert City හි පිහිටි SLTC විශ්වවිද්‍යාල මණ්ඩපයේ පැවත්වුණු උත්සවයකදී සිදු කෙරුණු අතර ඊට ප්‍රධාන අමුත්තා වශයෙන් ආචාර්ය රනිල් සුගතදාස මහතා සහභාගී වූයේය. SLTC පර්යේෂණ විශ්වවිද්‍යාලයේ ප්‍රධාන විධායක නිලධාරී/උප කුලපති ජ්‍යෙෂ්ඨ මහාචාර්ය වේරන්ජ කරුණාතිලක, එම විශ්වවිද්‍යාලයේ පාලක මණ්ඩලයේ සාමාජිකයින් වන ජ්‍යෙෂ්ඨ මහාචාර්ය ඩෙන්සිල් රෝසා සහ මංගල යාපා, ව්‍යාපාර කළමනාකරණ පීඨයේ පීඨාධිපති මහාචාර්ය හිලරි සිල්වා මහතා, ලේඛකාධිකාරී කෝස්මබිකා දේවේන්ද්‍ර මහත්මිය සහ අධ්‍යාපන අමාත්‍යංශයේ අතිරේක ලේකම් (රාජ්‍ය නොවන විශ්වවිද්‍යාල) චන්දිමා ජානකි මහත්මිය ඇතුළු පිරිස ද ඊට සහභාගී වූහ.

SLTC විශ්වවිද්‍යාලය විසින් පිරිනැමෙන නව MBA පාඨාමාලාව වසර දෙකක පාඨාමාලාවක් වන අතර එහි විශේෂත්වය වන්නේ එය SLTC විසින් ප්‍රවීණ ආචාර්ය මණ්ඩලයක් හරහා ප්‍රදානය කෙරෙන සම්පූර්ණයෙන්ම ශ්‍රී ලාංකික පාඨමාලාවක් වන නිසා MBA ශිෂ්‍යයෙක් හට අවශ්‍ය වන ප්‍රායෝගික දැනුම හා දක්ෂතා ලබා දෙන ආකාරයට නිර්මාණය කර තිබීමයි.

“වර්තමානයේදී වෘත්තිකයින්ගෙන් ඇති දැඩි ඉල්ලුම නිසා බොහෝ තැන්වල MBA උපාධි ප්‍රදානය කෙරෙන බව අපි දන්නා කරුණක්. නමුත් හුදු සහතිකයකට පමණක් සීමා නොවී සැබැවින්ම වෘත්තිකයෙක්ට අවශ්‍ය දැනුම සහ දක්ෂතා ලබාදීම ඉලක්ක කරගත් පාඨමාලාවන් ප්‍රමාණය ඉතාම අල්පයි. SLTC පර්යේෂණ විශ්වවිද්‍යාලයේ පශ්චාත් උපාධි අංශය විසින් MBA පාඨාමාලාවක් සැලසුම් කරන්නේ මේ අඩුව පිරිවීම ඉලක්ක කරගෙන. අපේ MBA පාඨාමාලාව හරහා දැනුමෙන් හා දක්ෂතාවයෙන් පිරිපුන් වෘත්තිකයින් බිහි කිරීම අපේ අපේක්ෂාවයි.“ යැයි මේ පිළිබඳව අදහස් දක්වමින්  SLTC පර්යේෂණ විශ්වවිද්‍යාලයේ ප්‍රධාන විධායක නිලධාරී/උපකුලපති ජ්‍යෙෂ්ඨ මහාචාර්ය වේරන්ජ කරුණාතිලක මහතා පැවසීය.

SLTC MBA පාඨාමාලව සම්බන්ධයෙන් තවත් සුවිශේෂී කරුණක් වන්නේ එය ඉතාම පහසු වියදමක් දරා සම්පූර්ණ කිරීමට හැකි වීමයි. එමෙන්ම සිසුන් තෝරා ගැනීමේ පටිපාටිය අධ්‍යාපන සුදුසුකම්, වෘත්තීය අත්දැකීම් හෝ වෘත්තීයමය අධ්‍යාපන සුදුසුකම් ඇති බොහෝ පිරිසකට අයදුම් කළ හැකි ආකාරයට නිර්මාණය කර ඇත. මේ පිළිබඳ වැඩිදුර විස්තර SLTC පර්යේෂණ විශ්වවිද්‍යාලයේ නිල වෙබ් අඩවිය වන www.sltc.ac.lk  වෙබ් අඩවියට පිවිස ලබාගත හැකිය.

ශ්‍රී ලංකාවේ විශාලතම රාජ්‍ය නොවන විශ්වවිද්‍යාලය වන SLTC පර්යේෂණ විශ්වවිද්‍යාලය ආරම්භයේ සිටම සිසුන්ගේ ප්‍රගතිය කේන්ද්‍ර කර ගත්, ප්‍රායෝගිකත්වය මත පදනම් වූ උසස් අධ්‍යාපනයක් ලබා දීමට කටයුතු කර ඇති ආයතනයකි. පර්යේෂණ විශ්වවිද්‍යාලයක් වශයෙන් නිරන්තරයෙන්ම පර්යේෂණ හා නව්‍යකරණය කෙරෙහි දක්වන කැපවීම SLTC MBA පාඨාමාලව තුළ ද කැපී පෙනෙන අයුරින් දැකගත හැකි වීම විශේෂත්වයකි.

SLTC පර්යේෂණ විශ්වවිද්‍යාලය විසින් ප්‍රදානය කෙරෙන නව MBA පාඨාමාලව සඳහා මේ වන විට අයදුම් පත් කැඳවා ඇති අතර පාඨමාලාව හැදෑරීමට උනන්දුවක් දක්වන්නන්ට www.sltc.ac.lk වෙබ් අඩවියට පිවිසීමෙන් පාඨමාලාව පිළිබඳ තොරතුරු මෙන්ම ඊට ඇතුළත් වීම පිළිබඳ තොරතුරු ද ලබා ගත හැකිය.

ආචාර්ය රනිල් සුගතදාස, උපකුලපති ජ්‍යෙෂ්ඨ මහාචාර්ය වේරන්ජ කරුණාතිලක, මහාචාර්ය හිලරි සිල්වා යන මහත්වරු රැස්ව සිටි පිරිසි අමතමින්

ඡායාරූප විස්තරය - SLTC පර්යේෂණ විශ්වවිද්‍යාලයේ  පාලක මණ්ඩලයේ සාමාජික මංගල යාපා මහතා විසින් SLTC MBA පාඨාමාලාවේ පළමු ශිෂ්‍යයා වෙත බඳවා ගැනීමේ ලිපිය නිල වශයෙන් ප්‍රදානය කරමින්