
අද (16) දින කොළඹ කොටස් වෙළෙඳපොළ ගනුදෙනු ආරම්භ වී මුල් පැය දෙක තුළ රු. බිලියන 9 ඉක්ම වූ දැවැන්ත පිරිවැටුමක් වාර්තා විය.
එහිදී සමාගම් දෙකක කොටස් හුවමාරු හරහා මෙම පිරිවැටුම වාර්තා වී ඇති බව කොටස් වෙළෙඳපොළ ගනුදෙනු පුවරුව පෙන්වා දේ.
ඒ අනුව CONVENIENCE FOODS LANKA PLC සමාගමේ ප්රමුඛ කොටස් හිමියා වූ CBL INVESTMENTS LIMITED සතුව පැවති 1,962,977ක කොටස් හිමිකාරීත්වය ගිවිසා ගනු ලැබූ ගනුදෙනු ලෙස හුවමාරු වී ඇති අතර රු. බිලියන 3.97ක පිරිවැටුමක් ඒ හරහා වාර්තා වී තිබිණි. එය සමාගමේ කොටස් ප්රාග්ධනයෙන් 71.38%ක ප්රමාණයකි.
මේ අතර කාර්ගිල්ස් (සිලෝන්) සමාගමේ කොටස් මිලියන 7ක ප්රමාණයක් ඒ වන විට වෙළෙඳපොළ ගනුදෙනු ලෙස හුවමාරු වී තිබුණේ රු. බිලියන 4.5 ඉක්ම වූ පිරිවැටුමක් ජනනය කරමිනි.
මෙම ගනුදෙනු දෙක අදාළ සමාගම් හි අභ්යන්තර කොටස් හුවමාරු ද, එසේ නැතහොත් එම කොටස් හිමිකාරීත්වයන් හි වෙනසක් සිදු වී ඇත්ද යන වග මෙතෙක් අනාවරණය වී නොමැත.
කෙසේවෙතත් ඒ වන විට කොටස් වෙළෙඳපොළ මිල දර්ශකවල දැවැන්ත පසුබෑමක් වාර්තා වී තිබුණු අතර පෙරවරු 11.40 වන විට සියලු කොටස් මිල දර්ශකය ඒකක 266කින් ද S&P SL20 දර්ශකය ඒකක 79කින් ද පහළ ගොස් තිබුණි.


















