
2027 වසර සඳහා වන ශ්රී ලංකා අයවැය මගින් ආයෝජන සහ සුළි සුළං හානි ප්රතිසංස්කරණ සඳහා වැඩි වියදම් වෙන් කරමින්, මූල්ය විනය සහ ණය අඩු කිරීම සඳහා වූ රජයේ කැපවීම තවදුරටත් පෙන්නුම් කරන බව ෆිච් රේටින්ග්ස් (Fitch Ratings) පවසයි. මූල්ය ඉලක්ක ඉක්මවා යෑම සහ ණය අඩු කිරීම කෙරෙහි දක්වන අවධානය හේතුවෙන් පසුගිය සැප්තැම්බර් මාසයේදී ශ්රී ලංකාවේ රාජ්ය ණය ශ්රේණිගත කිරීම (sovereign rating) 'CCC+' සිට 'B-'/Stable දක්වා ඉහළ නැංවීමට ෆිච් පියවර ගත්තේය.
2027 අයවැය සම්බන්ධයෙන් ෆිච් රේටින්ග්ස් වැඩිදුරටත් මෙසේ කියා සිටී.
2027 අයවැය මගින් දළ දේශීය නිෂ්පාදිතයෙන් (GDP) 2.3% ක ප්රාථමික අතිරික්තයක් ඉලක්ක කර ඇති අතර, එය 2026 දී ලැබූ 3.6% ක ඇස්තමේන්තුගත අතිරික්තයට වඩා අඩු වීමකි. 2027 වසරේදී සමස්ත අයවැය හිඟය දළ දේශීය නිෂ්පාදිතයෙන් 4.5% ක් වනු ඇතැයි අපේක්ෂා කෙරේ. 2027 සඳහා ප්රාථමික වියදම් දළ දේශීය නිෂ්පාදිතයෙන් 13.6% ලෙස අයවැය ගත කර ඇති අතර, 'දිට්වා' (Ditwah) සුළි සුළං හානි නැවත ගොඩනැගීමේ ප්රාග්ධන වියදම් හේතුවෙන් එය 2024 රාජ්ය මුදල් කළමනාකරණ පනතේ (PFMA) 13% පැනවූ සීමාව තාවකාලිකව ඉක්මවා යයි.
එසේම, රාජ්ය ආදායම 2026 පැවති 16.6% සිට 2027 දී 15.8% දක්වා මඳක් පහත වැටෙනු ඇතැයි ගණන් බලා තිබුණද, මෙම අයවැය ජාත්යන්තර මූල්ය අරමුදලේ (IMF) වැඩසටහන් පරාමිතීන් සමඟ සමපාත වේ. රාජ්ය ණය ප්රමාණය 2022 පැවති 115% සිට 2026 වන විට GDP යෙන් 92% දක්වා අඩුවනු ඇතැයි ෆිච් පුරෝකථනය කරන අතර, පොලී ගෙවීම් රාජ්ය ආදායමෙන් 41.0% දක්වා පහත වැටෙනු ඇතැයි අපේක්ෂා කෙරේ.





















