නාගරික සංවර්ධන අධිකාරිය පනත යටතේ, නාගරික සංවර්ධන හා නිවාස අමාත්‍යවරයා වශයෙන් අග්‍රාමාත්‍ය මහින්ද රාජපක්ෂ මහතා වෙත පැවරී ඇති බලතල ප්‍රකාරව, කොළඹ මහ නගර සභාව සතු කොල්ලුපිටිය සුපිරි වෙළෙඳ සංකීර්ණය පිහිටි ඉඩම 2021 අප්‍රේල් 15 දින සිට නාගරික සංවර්ධන අධිකාරිය වෙත පවරා තිබේ.

මීට අදාළ අතිවිශේෂ ගැසට් පත්‍රය පසුගිය අප්‍රේල් 24 දින ප්‍රකාශයට පත් කර ඇත.

මේ අතර කොළඹ නගරයේ පැරණි වෙළඳපොළ පරිශ්‍ර පුළුල් මහජන සේවාවක් සැපයීමට හැකි වන පරිදි නවීන පහසුකම් සහිතව ප්‍රතිනිර්මාණය කරන ලෙස නාගරික සංවර්ධන හා නිවාස අමාත්‍යවරයා සහ අග්‍රාමාත්‍යවරයා ලෙස අග්‍රාමාත්‍ය මහින්ද රාජපක්ෂ මහතා නාගරික සංවර්ධන අධිකාරියට උපදෙස් ලබා දී ඇත. එම ව්‍යාපෘතියේ පළමු අදියර ලෙස 1976 වසරේ ආරම්භ කළ කොල්ලුපිටිය වෙළඳපොළ, සංවර්ධනය කිරීමට නාගරික සංවර්ධන අධිකාරිය සහ කොළඹ මහ නගර සභාව එක්ව තීරණය කර තිබේ.‍

මීට දශක 04 කට පමණ පෙර සුපිරි වෙළඳසැල යනුවෙන් ද හැඳින්වූ කොල්ලුපිටිය වෙළඳපොළ එහි වෙළඳසැල් හිමියන්ගේ ද ඉල්ලීම මත වර්තමානයට සහ අනාගතයට ගැලපෙන ලෙස රාජ්‍ය පෞද්ගලික හවුල්කාරීත්වයෙන් (PPP) සංවර්ධනය කිරීම සඳහා නාගරික සංවර්ධන අධිකාරිය සහ කොළඹ මහ නගර සභාව අතර පසුගියදා ගිවිසුම් අත්සන් කෙරිණි.

එම ගිවිසුමට අනුව, කොල්ලුපිටිය වෙළෙඳපොළ මහල් 40කින් සමන්විතව නව බහු මහල් වෙළඳ පරිශ්‍රයක් ලෙස ඉදිකිරීමට නියමිත ය. අක්කරයක භූමි ප්‍රදේශයක් පුරා පැතිර ඇති කොල්ලුපිටිය වෙළඳපොළ ධර්මපාල මාවතට සහ ශාන්ත මයිකල් පාරට මැදිව කොල්ලුපිටිය නගර මධ්‍යයේ පිහිටා ඇත.