May, 9, 2026
වියට්නාමයේ නවීන මුහුණුවරක් ගත් දෙමුහුන් (hybrid) ගුවන් සේවාවක් වන වියට්ජෙට් එයාර්, කොළඹ සිට හෝ චි මිං නගරය දක්වා සිය සෘජු ප්රථම ගුවන් සේවාව දියත් කරන බව ශ්රී ලංකා - වියට්නාම වෙළඳ, ආයෝජන සහ සංචාරක සහයෝගීතා සංසදයේදී නිවේදනය කළේය.
මෙම නිවේදනය, වියට්නාමයේ මහා ලේකම් සහ ජනාධිපති තෝ ලම්, ශ්රී ලංකා අග්රාමාත්ය හරිනි අමරසූරිය සහ දෙරටේ ජ්යෙෂ්ඨ නිලධාරීන් ඉදිරියේ සිදු විය. මෙය ශ්රී ලංකාව සහ වියට්නාමය අතර මෙම ගුවන් සේවය ක්රියාත්මක කරන ප්රථම සෘජු ගුවන් ගමන් සේවාව වන අතර, එමඟින් ගුවන් සේවයේ ජාත්යන්තර ව්යාප්තියට සහාය වන අතරම දෙරට අතර ආර්ථික, වෙළඳ, සංචාරක සහ අන්තර් පුද්ගල සබඳතා ශක්තිමත් කිරීමට දායක වේ. කොළඹ - හෝ චි මිං නගරය අතර ගුවන් ගමන් සේවාව 2026 අගෝස්තු මාසයේදී සතියකට පැමිණීමේ හා ආපසුයෑමේ ගුවන් වාර හතරක් සහිතව ආරම්භ කිරීමට අපේක්ෂා කෙරේ. කොළඹ සිට ගමන් කරන මගීන්ට ඉක්මනින්ම සහනදායී ගාස්තු යටතේ වියට්නාමයේ ප්රධාන සංචාරක සහ ව්යාපාරික මධ්යස්ථාන වෙත ප්රවේශ වීමටත්, වියට්ජෙට් හි පුළුල් ජාත්යන්තර ගුවන් ගමන් ජාලය හරහා ඕස්ට්රේලියාව, ජපානය, දකුණු කොරියාව, චීනය ඇතුළු ආසියා පැසිෆික් කලාපයේ ප්රධාන ගමනාන්ත වෙත පහසුවෙන් ගමන් කිරීමටත් අවස්ථාව සැලසේ.
වියට්ජෙට් හි පළමු උප සභාපති දින් වියට් ෆුඔන්ග් මහතා පැවසුවේ, "හෝ චි මිං නගරය සිට කොළඹ දක්වා වන මෙම මාර්ගය දෙරට අතර නව ගුවන් සබඳතාවක් ඇති කරන අතර, එමඟින් දකුණු ආසියාව සහ ආසියා පැසිෆික් කලාපය පුරා වෙළඳ, ආයෝජන, සංචාරක සහ සංස්කෘතික හුවමාරුව සඳහා වන සහයෝගීතාව ප්රවර්ධනය කරයි" යනුවෙනි.
හෝ චි මිං නගරය යනු පැරණි සංස්කෘතිය සහ නවීන නාගරික ශක්තිය මුසු වූ ගිනිකොනදිග ආසියාවේ වඩාත් විචිත්රවත් සහ උද්යෝගිමත් ගමනාන්තයකි. ජාත්යන්තර සංචාරකයින්ට මෙහි ඇති කාර්යබහුල වෙළඳපොළවල්, ඓතිහාසික ගෘහ නිර්මාණ ශිල්පය, විචිත්රවත් රාත්රී ජිවන රටාව, ප්රසිද්ධ වීදි ආහාර මෙන්ම දියුණු කලා සහ කැෆේ සංස්කෘතිය අත්විඳිය හැකිය. සංකේතාත්මක සන්ධිස්ථාන සහ සංස්කෘතික අත්දැකීම්වල සිට සුඛෝපභෝගී සාප්පු සවාරි මෙන්ම වියෙට්නාමයේ වෙරළ තීරයන් සහ දකුණු ප්රදේශයේ ආකර්ෂණීය ස්ථාන වෙත පහසුවෙන් ප්රවේශ වීමට ඇති හැකියාව නිසා හෝ චි මිං නගරය රට ගවේෂණය කිරීම සඳහා ගතික දොරටුවක් ලෙස පවතී. වියෙට්නාමයේ ප්රධාන ආර්ථික සහ සංචාරක මධ්යස්ථානය ලෙස, මෙම නගරය ආසියා පැසිෆික් කලාපය පුරා කලාපීය සම්බන්ධතාවය, වර්ධනය සහ ජාත්යන්තර සහයෝගීතාව සඳහා නව අත්වැලක් ලෙස ද වර්ධනය වෙමින් පවතී.
වියට්නාමයේ ප්රමුඛතම නව මුහුණුවරක් සහිත දෙමුහුන් ගුවන් සේවයක් ලෙස, නවීන ගුවන් යානා සමූහයක්, පුළුල් ජාත්යන්තර ගුවන් ගමන් ජාලයක් සහ නව්ය, පාරිභෝගික කේන්ද්රීය සේවා හරහා ආසියා-පැසිෆික් සහ ඉන් ඔබ්බට ගුවන් සම්බන්ධතා ශක්තිමත් කිරීමේ කාර්යභාරය වියට්ජෙට් අඛණ්ඩව ශක්තිමත් කරයි.මෙම ගුවන් සේවය සතුව වර්තමානයේ 135 ක ගුවන් යානා සමූහයක් ක්රියාත්මක කරන අතර ජාත්යන්තර වෙළඳපල හරහා එහි දිගුකාලීන වර්ධනයට සහාය වෙමින් අමතර ගුවන් යානා 600 කට ආසන්න ප්රමාණයක් ඇණවුම් කර ඇත. වියට්ජෙට් සිය නවෝත්පාදනය සහ මෙහෙයුම් කාර්යක්ෂමතාව සඳහා පිළිගැනීමට ලක් වෙමින් , ස්කයිට්රැක්ස්, කැපා සහ එයාර්ලයින් රේටින්ග්ස් ඇතුළු ප්රමුඛ ගුවන් සේවා සංවිධානවලින් ජාත්යන්තර සම්මාන කිහිපයක් ලබා ගෙන ඇත.
ායාරූපය - වියට්නාමයේ මහලේකම් සහ ජනාධිපති ටූ ලැම් (මැදිව) සහ ශ්රී ලංකා අගමැතිනි හරිනි අමරසූරිය (දකුණේ සිට දෙවැනි තැන) ඉදිරියේ, වියට්ජෙට් ගුවන් සේවය, හෝ චි මිං නගරයේ සිට කොළඹ දක්වා සිය සෘජු මාර්ගය නිවේදනය කරන අවස්ථාව
Video Story
