හම්බන්තොට ජාත්‍යන්තර වරාය සමූහය (HIPG) සිය වාහන රඳවා ගැනීමේ ප්‍රතිපත්තිය සම්බන්ධයෙන් මෑතකදී පළ වූ මාධ්‍ය වාර්තා පිළිබඳව නිවේදනයක් නිකුත් කර තිබේ. වරාය තුළ දැනට ප්‍රතිඅපනයනය (transhipment) සඳහා සහ දේශීය අවශ්‍යතාවයන් වෙනුවෙන් ආනයනය කරන ලද වාහන 50,000කට අධික ප්‍රමාණයකට පහසුකම් සපයා ඇති බව එම නිවේදනයේ සඳහන් වේ.

මින් වාහන 1,278ක් පමණ මාස තුනකට වැඩි කාලයක් වරාය අංගනයේ පවතින අතර, වාහන 581ක් වසරකට වැඩි කාලයක් පුරාවට එහි රැඳී පවතී. මෙම වාහන සියල්ලම දේශීය වෙළඳපොළ සඳහා ආනයනය කරන ලද ඒවා වන අතර, වසරකට වැඩි කාලයක් පවතින වාහනවලින් බහුතරයක් ශ්‍රී ලංකාවේ පනවා තිබූ වාහන ආනයන සීමාවන් හේතුවෙන් පැන නැඟුණු තත්ත්වයන් මත පදනම් වූ ඒවා බව වරාය බලධාරීන් පෙන්වා දෙයි.

විශේෂයෙන්ම, වසරකට වැඩි කාලයක් වරායේ ඇති වාහන 581න් 400ක් පමණ 2025 දී වාහන ආනයනය නැවත ආරම්භ කිරීමට පෙර ගෙන්වන ලද ඒවා වේ. තවත් වාහන 175ක් 2020 දී පැනවූ ආනයන සීමාවන්ට පෙර ආනයනය කළ ඒවා වන අතර, වාහන 178ක් 2017 දෙසැම්බර් මාසයේදී HIPG කළමනාකාරිත්වය යටතට පත්වීමටත් පෙර සිට වරායේ පවතී.

වරාය බලධාරීන් අවධාරණය කරන්නේ වරායක් යනු භාණ්ඩ ප්‍රවාහනය පහසු කිරීම සඳහා නිර්මාණය කර ඇති ස්ථානයක් මිස දීර්ඝකාලීන වාහන රඳවා තබා ගැනීමේ ස්ථානයක් නොවන බවයි. වසර ගණනාවක් වරාය තුළ වාහන පවතින විට, නව භාණ්ඩ හැසිරවීමට සහ මෙහෙයුම් කටයුතු සිදු කිරීමට අවශ්‍ය වටිනා ඉඩකඩ සීමා වන බව ඔවුන් පෙන්වා දෙයි.

අදාළ නිවේදනයේ වැඩිදුරටත් මෙසේ සඳහන් වේ.

HIPG දැනට ක්‍රියාත්මක කරන ගබඩා ගාස්තු ප්‍රතිපත්තිය කලාපයේ අනෙකුත් වරායන්ට සාපේක්ෂව පාරිභෝගිකයින්ට ඉතා වාසිදායක මට්ටමක පවතී. ආනයනික භාණ්ඩ සඳහා දින 10ක නොමිලේ ගබඩා පහසුකම් ලැබෙන අතර (කලින් මෙය දින 3කි), ප්‍රතිඅපනයන වාහන සඳහා දින 21ක නොමිලේ ගබඩා කාලයක් හිමිවේ.

වාහන නිදහස් කර ගැනීමේ ප්‍රමාදයන් බොහෝ විට ලියකියවිලි දෝෂ, බැංකු ක්‍රියා පටිපාටි සහ මූල්‍ය කටයුතු වැනි වරාය පාලනයෙන් බැහැර කරුණු මත සිදු වන බව HIPG පවසයි. ගබඩා ගාස්තු අය කිරීමේ මූලික අරමුණ ආදායම් ඉපැයීම නොව, මෙහෙයුම් කාර්යක්ෂමතාව ඉහළ නැංවීම සහ පාරිභෝගිකයින් කඩිනමින් වාහන නිදහස් කර ගැනීමට දිරිමත් කිරීම බව එම සමාගම අවධාරණය කරයි.

අර්බුදකාරී කාලසීමාවන්හිදී පාරිභෝගිකයින්ට සහන සැලසීමට HIPG නිරන්තරයෙන් කටයුතු කර ඇත. ආනයන සීමා පනවා තිබූ කාලයේදී මෙන්ම ගල්ෆ් කලාපයේ පවතින ප්‍රවාහන බාධා කිරීම් හේතුවෙන් සිදු වූ ප්‍රමාදයන්හිදී පවා ප්‍රමාද ගාස්තු සඳහා සහන ලබා දීමට ඔවුන් පියවර ගෙන තිබේ.

ශ්‍රී ලංකා රේගුව සහ අනෙකුත් පාර්ශවකරුවන් සමඟ එක්ව, දැනට පවතින පැරණි වාහන සම්බන්ධ ගැටලු විසඳා ගනිමින් ශ්‍රී ලංකාවේ ආර්ථික වර්ධනයට අවශ්‍ය සහාය ලබා දීමට තවදුරටත් කැපවන බව හම්බන්තොට වරාය සමූහය නැවතත් ප්‍රකාශ කර සිටී.