කොළඹ කොටස් වෙළෙඳපොළ සියලු කොටස් මිල දර්ශක අගය අද (31) දින ගනුදෙනු අවසානයේ දී ඒකක 7,121.28 ක් ලෙසින් වාර්තා විය. මෙය පෙර දිනයට සාපේක්ෂව ඒකක 6.16 ක ඉහළ යාමකි.

2021 වසර ආරම්භයේ දී සියලු කොටස් මිල දර්ශකය ඒකක 6,774.22 ක් ලෙසින් වාර්තා වූ අතර ඒ අනුව මෙම වසරේ මුල් මාස 03 අවසානයේ දී එහි 5.12% ක වර්ධනයක් වාර්තා වේ.

කෙසේවෙතත් 2021 මාර්තු මාසය සැලකීමේ දී පෙබරවාරි මාසයට සාපේක්ෂව ඒකක 355.06ක පහළ යාමක් සියලු කොටස් මිල දර්ශකයෙන් නිරූපණය වේ. 2021 පෙබරවාරි මාසය අවසානයේ දී සියලු කොටස් මිල දර්ශක අගය ඒකක 7,476.34 ක්වූ අතර එය අද වන විට ඒකක 7,121.28 ක් දක්වා පහළ ගොස් තිබේ.

කොළඹ කොටස් වෙළෙඳපොළ ඉතිහාසයේ ඉහළම සියලු කොටස් මිල දර්ශක වටිනාකම 2021 ජනවාරි 27 දින වාර්තා වූ අතර එය ඒකක 8,812.01 කි.

අද දින රු. මිලියන 777.89 ක ගනුදෙනු පිරිවැටුමක් වාර්තා විය.