ලොව පුරා අතිශය ජනප්‍රිය පුද්ගලික මූල්‍ය උපදේශන ග්‍රන්ථයක් වන ‘Rich Dad Poor Dad’ හි කර්තෘ රොබට් කියෝසාකි (Robert Kiyosaki), මේ වන විට ඩොලර් බිලියන 1.2ක ණයගැතියෙකු බවට පත්ව තිබේ. තමන් විසින් සිදුකරන ලද දේපළ ආයෝජනයන් හේතුවෙන් තමා මෙලෙස ණයගැතියෙකු බවට පත්ව ඇති බව ඔහු විසින් ප්‍රකාශ කර තිබේ.

රොබට් කියෝසාකි පසුගිය වසරේ දී ශ්‍රී ලංකාවේ ද සංචාරයක නිරත වූ අතර ඔහු එහි දී අද දෙරණ 24 සමඟ සම්මුඛ සාකච්ඡාවකට එක්වෙමින් ශ්‍රී ලාංකිකයන්ගේ මූල්‍ය සාක්ෂරතාවය පහළ මට්ටමක පවතින බව පැවසීය.

මේ අතර පසුගිය දා podcast සම්මුඛ සාකච්ඡාවකට එක්වෙමින් ඔහු කියා සිටියේ ආදායම් ඉපයීම සඳහා මුදල් ණයට ගැනීම සිය ප්‍රධාන ආයෝජන උපාය මාර්ගයක් බවයි. කෙසේවෙතත් තමන්ගේ ක්‍රමවේදය කිසිවිටෙකත් අනුකරණය නොකරන ලෙස ඔහු මෙහිදී අවධාරණය කර ඇත.

කියෝසාකි දිගු කලක් පුරාවට නිශ්චල දේපල වැනි ආදායම් උපදවන වත්කම් ලබා ගැනීම සඳහා ණය භාවිතා කිරීම ප්‍රවර්ධනය කර ඇත. පොහොසත් ආයෝජකයින් ධනය ගොඩනැගීමට ගන්නා ණය සහ වියදම් පියවා ගැනීමට ගන්නා ණය අතර වෙනස නිවැරදිව හඳුනා ගන්නා බව ඔහු පෙන්වා දෙයි.

ඔහු විසින් රචිත, 1997 වසරේදී ප්‍රථම වරට ප්‍රකාශයට පත් කරන ලද ‘Rich Dad Poor Dad’ කෘතිය මේ වන විට පිටපත් මිලියන 44කට වඩා අලෙවි වී ඇති අතර, එය කියෝසාකි පුද්ගලික මූල්‍ය ක්ෂේත්‍රයේ වඩාත්ම කැපී පෙනෙන සහ බලගතු හඬක් ලෙස ස්ථාපිත කිරීමට සමත් විය.